LMPS E TSOSOLOSA SELEKANE LE BEAUTIFUL DREAM SOCIETY
Ka Moipone Makhemeng
La 12 ‘Mesa 2023
Mookameli oa sepolesa, monghali Holomo Molibeli ‘moho le mookameli oa mokhatlo oa Beautiful Dream Society (BDS), mofumahali Mojabeng Makhalalelo, ba tekenetse selekane sa tšebelisano-‘moho mabapi le ho tšoarana ka matsoho ho fenya tlolo ea molao ea khoebisano ka batho.
Mofumahali Mojabeng Makhalalelo, o tekena le mookameli oa sepolesa
Sepolesa se ile sa tšoara ‘moka oa baphatlalatsi kajeno Ntlo-Kholo ea sepolesa Maseru. Mohlahlami oa Mookameli oa Sepolesa, DCP Beleme Lebajoa o ile a bula ‘moka ka ho fana ka nalane ea tšebetso lipakeng tsa sepolesa le mokhatlo ona moo a ileng a supa ha likamano tsa tšebelisane li qalile ka 2011. A re esale kamano ena e thakhoha BDS e thusitse mahlatsipa ka tlhabollo. Hape a re BDS e thusitse liphofu le ka mokhoa oa ho palama (transport) ho re a tsebe ho ea sepoleseng.
Mookameli oa sepolesa le raliphatlalatso, Senior Superintendent Mpiti Mopeli
Ha a bua ‘mokeng ona, mopresitente oa mokhatlo monghali Molikoe Lali o totobalitse hore mokhatlo ona o sebetsana le ho thibela botlokotsebe ba khoebisano ea thekisetsano ea batho ‘me o boetse o fa mahlatsipa tsosoloso le ho fa ba tlokotsing moo ba ka tšabelang.
Ke puong ea hae moo Lali a hlalositseng hore mokhatlo ona o thehiloe ka selemo sa 2010 ‘me esale o na le kamano e khetholohileng le Sepolesa sa Lesotho tšebetsong ea oona.
DCP Beleme Lebajoa
Ha a tsoelapele o bontšitse hore ka 2021 mokhatlo o ile oa ba le ‘Boarder Stream Project’ moo morero e neng e le ho fana ka thuto mabapi le tlokotsi ea thekiso ea batho ‘me ke batho ba 351 ba neng ba le tlokotsing ea ho rekisoa empa ba pholosoa. O bontšitse hore ba sebelitse le sepolesa sa Lesotho ka makhethe ho thibela le ho tšoara litloli tsa malao khoebisanong ka batho.
Ka tsela e tšoanang, Mookameli oa Sepolesa, monghali Molibeli le eena o ile a fana ka puo moo a ileng a bontša hore sepolesa ‘moho le BDS li tla hlola tlolo ena ea molao eo a bontšitseng e le kholumo-lumo e ka senyang bokamoso ba bana ba batho bo chabileng. O hlokomelitse hape hore litšenyehelo tsa ho pholosa motho ea seng a rekisitsoe li boima ho feta ho thibela pele ketso e joalo e etsahala, ke ka hona ho leng molemo ho e thibela pele e ka etsahala.
Ba bileng teng tekenelong ea selekane
Molibeli o phethetse ka ho bontša hore le bahlankana ba banyane ba ea rekisoa moo a supileng hore ba ea lisa ebe ha ba fuoe meputso ea bona empa ka nako e ‘ngoe meputso ea bona e fuoa ba ikarabellang ho bona, ebe khabareng ha e ba tsoele melemo ‘me boipeletso ba hae ebile hore sechaba se tšoarane ka matsoho ho felisa taba e joalo.
