MOTLOTLEHI O RE O NE A RATA MENATE
La 29 Tlhakubele 2023
A bua a fana ka matšeliso lefung la mofu Ntate Peter Mokebe Monyake ka la 25 Tlhakubele 2023, Maseru, Motlotlehi Letsie III o re o hotse a rata menate haholo kaha le eena o ne a nyanyaka le ho inyakalatsa meketeng ea boithabiso le bo-ausi le bo-abuti ba ratang menate.
Rea mo qotsa Khosi Rabasotho. “Mofu moholoane enoa oa ka, ntate Peter Mokebe ke mo tsebile ha re le sekolong mane Iketsetseng. Ke ne ke sa le monyane ke lekana le palo ena (o supa palonyana e behileng lipalesa pela lekese).
“Mofu ke mo tsebile lilemo tse fetang 50 kaofela.
“Leha ke ne ke se in the inner circle, ntho eo ke ratang ho e paka litabeng tse builoeng mona ke hore ntate Peter was always the life of the party – o ne a rata monate.
“Ha bophelo ke ntse ke hola-hola le ‘na ke tiea-tiea, ka ba le takatso [ea menate], ke ile ka ba lehlohonolo la hore ke ‘ne ke nyarele within that circle ea batho bana; bo-ausi bana le bo-abuti bana ba neng ba tumme ka ho rata monate. Che ke ne ke re le utloisise hoba ‘na ke ne ke nyarela feela [monateng mono]. Ke ne ke se karolo ea bona.
“Hantle ke ntse ke ipotsa hore na ho nyareleng hoo hoa ka ha e le hantle ke ne ke menngoe mono kapa joang. Empa ke ile ka ba paki, ka li bona ‘me ka natefeloa le ‘na.” Khosi o rialo ‘me batho ile ba oa fatše ke litšeho, ba qabohile ha ba utloa Motlotlehi a ba bolella hore o ne a rata menate haholo.
Motlotlehi o phethetse ka ho tšelisa lelapa la Mokebe, bana ba bo-mofu le sechaba ka tahlehelo ea ho feta hoa Ntate Peter Mokebe ea ileng a phomotsoa borokong ba hae ba ho qetela ka la 25 Tlhakubele 2023, Upper Thamae, Maseru.
