LIBOHOLI HA LI E-S’O KHOLE
Ka Moipone Makhemeng
La 6 Tlhakubele 2023
Li eme ka lijoko li hana ho tšela ka ho bahlanka ba Lekala la Likhokahanyo bao e leng liboholi liea-le-moeeng tsa ‘muso oa Lesotho.
Basebetsi bao ba re ba tobane le qholotso e kholo kaha le kajeno ha ho e-s’o be le nko ho tsoa lemina kapa eona tlhaloso hore na meputso ea bona ea khoeli ea Hlakola e faretse hokae.
Ho sa le joalo, ketsahalo ena e bonahala e sa jese baphatlalatsi bao litheohelang hoo e mong oa bona a ileng a maneha leqepheng la marang-rang a Facebook sello sa hae.
E mong oa liboholi, Boitelo Rabele ea sebetsang Ultimate FM, o bontšitse hore leha ba tsoa ka makhalo ‘ohle ho fumana litaba tseo ba tsebang hore batho ba hloka ho li tseba empa le kajeno ba tsoha ka mala a se nang letho kaha bahiri ba iphapantse ba sitiloe ho ba lefa ka nako.
Ha a fera Boitelo Rabale o bontšitse ha meso e tsoala mesoana ho se na tlhalosetso eo ba e fuoeng mabapi le tiehiso ea meputso ea bona. Ka lehlakoreng le leng e mong oa baqolotsi ea kopileng ho se tsejoe ka lebitso o bontšitse ha eena a amohetse hore ke mosebetsi ea thusanang feela kaha ho sa fumanoe ho le bohlokoa hore a ka tsebisoa se bakileng tiehiso meputsong ea bona.
Moqolotsi oa rona o ile a atamela ofisi ea khiro Lekaleng le amehang a kopana le e mong oa bahlanka ofising ea khiro ‘m’e Likeleli empa a latola ka khalefo puisanong le moqolotsi oa rona ka le reng litaba tseo li sa le kahare ho Lekala ‘me a ka se bue letho le baqolotsi ba litaba. A bontša ha ba sa sebetsana le tsona ho bona hore basebetsi ba ea thuseha.
