MOSEBETSI OA MOOKAMELI OA LEC TLOKOTSING
Ka Moipone Makhemeng
La 6 Tlhakubele 2023
Bekeng e fetileng toropo ea Maseru ekasitana le metse e mathoko le eona e ile ea ba leqemeng le tšabehang la tlhokahalo ea metsi kamora hore koporasi ea motlakase (LEC) e khaole phepelo ea motlakase matamong a tlhoekiso ea metsi a Kompone ea Metsi le Likhoerekhoere (WASCO).
Mookameli oa LEC, monghali Mohato Seleke bekeng e fetileng a hlaloselitse komiti ea paramente e lisitseng lihloliloeng hore ba khaotse motlakase hoba WASCO e ba kolota M40 milone.
Komiti e ile ea sola qeto ea Seleke ea re ke phoso ho khaolela sechaba metsi ka sebopeho se joalo kaha e re LEC e ne e sa kopana le mahlakore ‘ohle tabeng ena.
Ho sa le joalo, bekeng ena ho hlahelletse menyenyetsi e supang ha ‘muso o le mathuleng a ho hlabisa mookameli Seleke thoto ka monkhoane.
Ea tšoereng molepo e le Mookameli oa Liphatlalatso, LEC monghali Tšepang Lidia, puisanong le Leihlo la Basotho kajeno o boletse ha lengolo leo ka lona ho utloahalang le ngolletsoe mookameli oa koporasi monghali Seleke, a ke ke a le lumela kapa a hanana le litaba tsa lona kaha litaba tse joalo li e-s’o fihle tafoleng ea hae.
Ts’epang Ledia
Menyenyetsi e tsoela-pele ho re Seleke o laetsoe ho fana ka mabaka ao ka ‘ona a ke keng a behelloa ka thoko ho mosebetsi.
Ka ho le leng, Lidia o hlalositse hore koporasi ea habo e tlo qala letšolo la ho fetola linomoro tsa motlakase (meter numbers) ho tloha kajeno. Sena se tla kamorao hore ho fihle tlhokomelong ea bona hore linomoro li se li tla felloa ke nako isao ‘me ka hona ho qoba tšubuhlellano ba tla qala kajeno.
