MOKHOTHU O PEPESA BOLEHE BA ‘MUSO
La 5 Tlhakubele 2023
Moetapele oa lekhotla la Democratic Congress, Mathibeli Mokhothu kajeno o bile lebatooeng la Mechachane Butha-Buthe ho bua le baleteli ba hae. Har’a tse ling, Mokhothu o lebohile sechaba sa Mechachane se ileng sa khetha DC hore e hlole lebatooa leo. O boetse a ipiletsa hore sechaba sa Mechachane se ‘ne se tsoele-pele ho ea khetha Potoana likhethong tse tlang tsa makhotla a puso ea libaka.
“Sechaba sa Basotho se bone ‘me se se hlole se tsamaea le bana ba lifofane hobane ke bana ba betsa liketo ka sechaba sa Basotho. Re ile ra bolela hore mabele a tlaleng ha a bofshoe ka mathapisane; ra re puso ha se potele e khoathoang ka lehlaka, ra re puso ha se Sebapala nokana ea Quthing e tšeloang le ke masea.
“Ke bana kajeno phalo e eme le lesemela paramenteng mono ba sitoa feela ho fetisa tlhopho bocha eo ba e fumanang e felile molao o kene ka paramenteng oa mpa oa lihoa ke likahlolo tsa makhotla.
“Kajeno ba na le likhoeli tse tharo ba hana ho phahamisa leoto tabeng eno ea tlhopho bocha. Ke utloa ba re ba tla e felehetsa ka mekhahlelo ‘me ha ba etsa joalo nka ba tiisetsa le ho ba hlapanyetsa ke le Mechachane mona hore ha se bona ba tla fitisa tlhopho-bocha. Ho na le ‘muso o tla tla ha ba sitoa ho folofela leraha.
“Kea le leboha sechaba sa Mechachane ha le sa ka la khetha batho bane ba reng ba batla litlolo tsa molao tse tsitsitseng. Le ile la re mamela la khetha lekhotla lena la DC. Batho ke bana ba shoa ‘nyene le bosiu, le liphoofolo tsa batho li nkuoa ka mahahapa sethunya se qeta sechaba sena sa Moshoeshoe hobane batho ba batlile litlolo tsa molao tse tsitsitseng. Ha u kopa ntho e itseng ho Molimo, o tla u fa eona. Ha u kopa tlhapi a ke ke a u fa noha u tla u fa tlhapi. Tlohellang ho khahloa ke makhotla ana a feshene.
“Lekhotla lena la DC le na le bokamoso. Ha re le bohanyetsing re tlo phetha boikarabelo ba rona. We are a government in waiting.” O rialo Mokhothu.
O phethetse ka ho nyatsa liketso tsa ‘muso ho leleka bahlanka ba ‘muso ka le reng ha se balateli ba bona. A re ba tla k’hueletsa ‘muso ha o sitoa ho lefa baoki. A re ba tla ema ba kharume ha ‘muso o thetsa sechaba ka ho ba thusa hore ba leme feela ho sa ba joalo.
Motaung a re ba tla k’hueletsa sefofane se keneng ka fenstere hobane seo se ka thoko ho molao. A ipiletsa hore sechaba sebetse ka thata ho lisa ‘muso.
