HO ROPOHA MORUSU KAHARA SR
… MESHA E PHINYETSANE
Leihlo la Basotho – 28 Hlakola 2023
Khotso e lukeha kamehla kahara mekha ea lipolotiki ‘me bekeng ena ho lubakane lekhotleng la Socialist Revolutionaries (SR) leo moetapele oa lona e leng Monghali Teboho Mojapela. E mong oa bathehi ba lekhotla leo ea sebelitseng ka thata ho theha mokha ona, molula-setulo oa liboka, monghali Thabo Shao o utloahetse a heletsa mafika khahlanong le moetapele oa hae Mojapela hoo bang ba reng mesha e phinyetsane.
Likhohlano tse itšemmeng bora kahara lekhotla lena li qalile ho iponahatsa ha mojao oa likhetho tsa komiti e ncha o thakhoha moo monghali Shao a iketelang setulo sa motlatsi oa moetapele.
Leha ho le joalo, boiketo ba Shao bo bonahala bo sa thabisa moetapele Mojapela kaha a buile seea-le-moeeng sa lehae Tšenolo FM a supa hore Shao ha a na makhabane a ho ba motlatsi oa moetapele kaha a itšoere hampe a sa hlomphe batho. A supa hore Shao ke ramenyetla ea se nang thuso.
Shao le Mojapela ba ne ba sebetsa ‘moho
Shao ha a araba litaba tsa Mojapela o itse: “Moetapele enoa ha a tsebe ho atamela litaba hantle hoo batho ba neng ba re ba ke ke ba bua le motho ea emang mona a re batho ke likatana, ke mafutsana a re batho ke lihole. A re batho ke ling, ba shebile lichelete tsa hae. Batho ba itse ‘re ke ke ra khetha motho oa sebopeho se tjena oa mofuta ona’.
“Ke tla li bua litaba tsena; akere o ntse a bua ka ‘na liea-le-moeeng moo? A tle a hopole hore batho ba Butha-Buthe ‘na ke sebelitse le bona tlaase mane ke kena malapeng a bona nakong ea campaign ea likhetho. Batho ba ntjoetsitse mathata ka motho enoa.
“Moetapele ha a batla hore a hlomphuoe ke ee ke re a tle a bue litaba tse tla etsa hore batho ba tle ba mo hlomphe, hape re mo hlomphise ka sechaba.
“Lekhotla lena ke la sechaba; ha u qala u ngolisa mane IEC ‘ownership ea party‘ e tloha ho uena u le motho. Moetapele a ke ke a etsa liqeto a le mong a hata batho litorong, a iketsetsa liqeto batho ba sa bue. Batho ba lokela ho bua ha li qeto li se molemong oa lekhotla kapa li hatikela molao oa motheo oa lekhotla.
“O ne a hana ha batho ba thusa lekhotla ka lichelete hobane a shebile ho etsa borata. Khale re mamelletse litaba tsena ebile ‘na ke sirelelitse eena ntate Mojapela’ for the longest time’ ha ho ntse ho buuoa lintho tse mpe ka eena tsa bo-Maseretse, le ntho tse ngata tsa banana ba bangata. Ke ‘na ea neng a sireletsa litaba tsa mofuta ono hoba ke ne ke tseba hore motho enoa ke moetapele oa ka ebile ke moholoane oa ka, ke tlameha ke mo sireletse.
Haeba o batla ho ea moo a batlang re ee mono, re tla ea, hoba ha ke na tšaba motho. U ke ke oa ema mona oa tsamaea batho holimo joalokaha eka o holimo ho batho ba bang. Ho salang ho phela ke hore ha u hanana le lintho tse mpe le liqeto tse nyontšang kahara party ena ho tla thoe batho ba tjena, ba tjena.” Ke Shao a bua Tšenolo FM ka la 26 Hlakola 2023.
