BAHLANKA BA ‘MUSO LOTING BA BATLA NYOLLO
La 26 Phupu 2023
Bahlanka ba Lekala la Bophelo literekeng tse Maloting, Mokhotlong, Thaba-Tseka le Qacha’s Nek ba seboko ke chelete e tlaase eo ba e fuoang e le litsiane tsa ho sebetsa maloting e kaalo ka M270 (Hardship Allowance). Chelete ena ba e lefshoa khoeli le khoeli ‘me e kenella meputsong ea bona.
Bahlanka ba ngolletse letona la bophelo, Selibe Mochoboroane, lengolo moo ba tsekang hore M270 e nyolleloe ho M5000. Ba tšetleha mabaka a ‘maloa kopong ea nyollo eo.
Lebaka la pele; ba re litjeo tsa bophelo li nyolohile haholo empa M270 esale e ema nqa e le ‘ngoe lilemo-lemo. “Litsiane tsa ho sebetsa maloting ka nepo e lokela e-be matšeliso mathateng ao re sebetsang ho ‘ona hoba re hole le malapa a rona.
“Chelete eo e lokela ho re thusa ho ea mosebetsing le ho khutlela malapeng a rona. Litsiane tse fanoang hajoale li fokola haholo ebile li re utloisa bohloko le ho feta re se ntse re sebetsa maemong a boima hakana.
Setsi sa bophelo Mohlanapeng, Thaba-Tseka
“Re lokela ho ikotla lipokotho, re sebelisa eona cheletana ea meputso ea rona ho ea malapeng.” Karolo ea lengolo e baleha joalo.
Ntlha ea bobeli, bahlanka ba lla ka tlhokahalo ea lisebelisoa litsing tsa bophelo. Ba re khafetsa ba tlameha ho ikotla lipokotho ho thusa bakuli. Ba etsa mohlala hore ba letsa ka moea oa bona ho lokisa taba ea makoloi a thusang bakuli. Ba re kaha motlakase o tima lihora-hora ba ee ba ikotle lipokotho molemong oa bakuli ba reka motlakase litsing tsa bophelo moo ba sebetsang.
“Libakeng tse ling moo ho fihlehang ka thata, ho sebelisoa matla a letsatsi ‘me nakong ea lipula tsa matlopo-tlopo motlakase oa fela. Liphapusi tse ling tsa bakuli, haholo tsa pepiso, lifuthumatsi tsa khase le tsona li ea tima ha khase e felile ‘me ba ee ba hauhe ka ho ikotla lipokotho.
“Mona ka ho tšoana, bahlanka ba tlangoa ke maemo ho sebelisa chelete ea bona hore feela mosebetsi o tsoele-pele.” Ke lengolo la bona.
Ho feta mona, ba re taba ena e sithabetsa bahlanka holim’a litsietsi tseo ba tobaneng le tsona tsa ho sebetsa libakeng tse mathata joalo.
“Tlas’a mabaka a rapalalitsoeng re kopa hore ofisi ea heno e re nyollele litsiane tsa ho sebetsa loting ka M5000 khoeli le khoeli. Chelete ena re kopa e tle nyolloe selemo le selemo ha meputso e nyolloa. Re kopa chelete ena e se ngoloe lejoeng e sa fetoloe joalokaha ho etsahetse lilemo-lemo e sa eketsoe.
Ha re phethela, re boela re etsa kopo hore o kenye tšebetsong moropotso o bitsoang “Rural Allowance” e leng o tla fuoa basebetsi ba sebetsang loting. Re kopa moropotso oo e-be o hlamatsehang ho hohela batho ho tla sebetsa maloting mona.” Le rialo lengolo.
