‘MUSO O BATLA MATŠELISO A BASOTHO RSA
La 11 Phupu 2023
Tona-kholo Sam Matekane o romme Letona la Machabeng, monghali Lejone Mpotjoane ho ikisa Pretoria ka sepheo sa ho batla mats’eliso a Basotho.
Kajeno Mpotjoane le moifo oa hae ba kopane le letona la Afrika Boroa la Khiro le Bosebetsi, monghali Thulas Nxesi. Sepheo e bile ho seka-seka ho potlakisa phano ea lichelete tsa matšeliso a saletseng morao a banna ba Basotho ba sebelitseng merafong ea Afrika Boroa.
Ho ea ka polelo e lokollotsoeng ke Lekala la Khiro le Bosebetsi Afrika Boroa kajeno, letona Nxesi o tobokelitse hore tefo ea matšeliso ho basebetsi ba mehleng ba merafo ke taba e ka sehloohong tikolong ena e ka boroa ho Afrika.
Nxesi o re likete-kete tsa basebetsi ba mehleng ba merafo ba kolotoa matšeliso ke merafo, ‘me o boletse hore basebetsi ba bang ke ba ileng ba lemalla merafong.
“Taba ea bohlokoa ke hore re tle ka maoa a hore lichelete li finyelle ho beng ba tsona. Re tlo etsa ka matla re thetsane ka mahetla le makala a bophelo le lirafshoa ho bona hore phano ea matšeliso e ea potlakisoa.” Ke Nxesi a bua kopanong.
Ho sa le joalo, letona Mpotjoane le moifo oa hae ba tla ba Pretoria matsatsi a mararo. Ba boetse ketelong ena ba tla kopana le mafapha a mang a amehang tefong ea matšeliso e leng Compensation Fund, The Unemployment Insurance Fund, National Economic Development and Labour Council le Commission for Concilliation Mediation and Abitration.
Matona ka bobeli a lumellane hore likamano tse mofuthu tseo esale li rena lipakeng tsa linaha tsena ha lia lokela ho thunthetsoa ka letho.
Nxesi o re: “Re na le likamano tse mofuthu le Lesotho ‘me ha re batle ho li thunthetsa. Re lokela ho hopola seabo seo Basotho ba bileng le sona nalaneng le khahong ea moruo oa naha ea rona. Haeba re etsa melao e laolang batho ba tsoang le ba kenang Afrika Boroa, re lokela ho etsa melao e fapaneng ha re lebile Basotho.”
Letona Mpotjoane o ile a thatiselletsa litaba tsa mphato’ae ka hore likamano tsa Lesotho le Afrika Boroa li tšoana le tsa ngoana le ‘m’ae ‘me a phethela ka hore ba ntse ba ithuta tse ngata ho Afrika Boroa.
