TŠOMO EA PELE:
SEETETELANE
Ba re e ne e le Seetetelane, joale a se na mosali; a phela ka litali feela. O ne a bile a apara kobo ea litali, hape a tena tšeea ea litali. Ka mohlomong o ne a il’o tsoma litali eaba o thola lehe, a re: “Lehe lena le tla jooa mohla moea o hlahang koana. A le beha ka sepholletsing sa ntlo. Joale a tsamaea, a ea naheng.
Ha a khutla, a fumana ho se ho sitsoe bohobe, a riteletsoe le joala, kamehla eohle. Eare ha a fihlile a re: Seetetelane, etela bosoha, kapa bohojoana boo u bo siletsoe ke mang? A ja lipolokoe tsena, a li qeta; a noa le joala, a bo qeta.
Ka mohlomong lehe lena la tsoa motho ka hare ho lona. A re: Seetetelane, leha u se u tauoe ke bo joang joala, u se ke oa re ke mosali oa lehe la mpshe. Ka mohlomong mosali enoa a re ho Seetetelane: “Na u rata batho na? Seetetelane a re: ‘E, kea ba rata.’ A pola thotobolong mosali eo.
Eitse hosane a tsoha, e se e le lerata la batho le leholo, la fihla ho Seetetelane, Seetetelane a apere kobo ea phokojoe, e se e le morena e moholo.
Ba fihla ho eena, ba re: E morena! le bana ba banyenyane. Ea sala e le: E morena! kaofela le lintja. Likobo tsa khomo li ne li le ngata, motse o se o le moholo.
Seetetelane ke morena e moholo, o se a sa apere matatana a litali, a apara liphokojoe, a robala mosemeng. Ka mohlomong a tahoa ke joala haholo.
Ha a tahiloe haholo, a re fuu ke joala, a re: Morali oa lehe la mpshe! mosali a re: Na ekaba ke uena, Seetetelane, u reng ke morali oa lehe la mpshe? A pheta a rialo Seetetelane. Mantsiboea ba robala ka liphokojoe, ba robala hamonate mosemeng. E itse ha Seetetelane a phaphama, a fumana a se a nametse fatše, a se a apere matatana a litali a sa fihleng maotong, a hatsetse. A fumana mosali eno a se a le sieo; le batho bao ba ne ba le sieo kaofela. A re ka phopholetsa, a fumana a s’a ile le liphokojoe tsa hae.
A qala ho hopola, a re: Ana ke itse ke morali oa lehe la mpshe? A ba a re: A ‘na eloa! A ba a re: Mm, ke tla etsa joang? Eaba e se e le lesooa joale, a ba a tsofala a ntse a phela ka nama ea litali, ‘me qetellong a ba a shoa.
Ke tšomo ka mathetho.
