LETONA LA LICHELETE LE TEKA LIKHAKANYO
Leihlo la Basotho News – La 27 Hlakola 2023
Letona la Lichelete, Dr. Retšelisitsoe Matlanyane kajeno Ntlong ea Bakhethoa ba Sechaba o tekile likhakanyo tsa lichelete sa selemo sa 2023/24. Har’a tse ling Matlanyane o re moruo oa naha o soahlamane ka lebaka la Covid-19 e ileng ea nyotobetsa moruo oa lefatše. A re ntoa ea Russia le Ukraine e bakile ho nyoloha hoa litheko tsa lijo ka tsela e tšosang.
Dr. Matlanyane a toboketsa hore morero oa ho teka likhanyo tsena ke ho hlasimolla moruo o hulang ka litlhako tsa morao ekasitana le ho thusa moruo ho itšematlela. O boetse a toboketsa hore e le ho baballa chelete, ‘muso o tlo kenya tšebetsong maoa a latelang: Ho hlahloba manane a bahlanka ba ‘muso khafetsa e le ho sheba lipoko.
E le ho motsula bobolu le ho sebelisa marang-rang ho reka thepa ea ‘muso ekasitana le ho qoba ho reka thepa e turisoang haholo ke lik’hamphani tse ling tse hoebang le ‘muso.
Letona Matlanyane a bontša hore bahlanka ba ‘muso ba tlil’o nyolleloa ka 2.5% meputsong athe metsofe eona e tla nyolleloa ka M50 hore ba amohele pei ea M900.
Mohlomphehi a re Lesotho le na le mekoloto e kaalo ka M22 bilone ‘me ho eona M4.3 bilone ke mekoloto e kahara naha athe machabeng naha e kolota M17.7 bilone
MEKHOA EA HO KENYA CHELETE MOKOTLENG OA ‘MUSO
Dr. Matlanyane o boletse hore ‘muso o tlo etsa bonnete ba hore melao e meng ea pokello ea lekhetho e fetisoa ke paramente. A re ba batla ho kenya tšebetsong mekhoa ea sejoale-joale pokeletsong ea lekhetho, haholo ka tšebeliso ea marang-rang.
KAKARETSO EA POKELLO EA LICHELETE
Letona le itse ba hopotse ho bokella kakaretso ea chelete e kaalo M25.1 bilone ‘me kuno e kaalo ka M10,1 bilone e tla hlaha ho South African Customs Union (SACU) athe pokello ea lekhetho e tla ba M10.9 bilone hammoho le ho qotsa mehloling e meng ea kuno.
“Selemong sena M17.8 bilone e tla sebelisoa e le ea leino athe M6.3 bilone e tla ba ea litlafatso. Re tla hlokomela hore selemo se fetileng ea leino e ne e le 16.3 bilone ‘me ea lintlafatso e le 6.7 bilone.” Matlanyane o rialo.
KABO EA LICHELETE HO MAKALA
M3.2 bilone e tla abeloa lekala la bophelo ho phetha mabaka a lekala leo haholo toantšong mafu le ho reka lisebelisoa tsa mechini lipetleleng.
Baithuti ba thuto e phahameng ba tla abeloa chelete ea lihlapiso e kaalo ka M1.1 bilone. ‘Muso o tlo hlopha bocha phano ea lehlapiso ho shebuoe baithuti ba hlokang ebile ho tsepamisitsoe mahlo lithutong tse itseng tse tla hloauoa.
“Ke etsa mohlala; National University of Lesotho e tlo thakhola lengolo la MSc in Integrated Catchment Water Resources ‘me Lerotholi Polytechnic eona e tla khakola mangolo a Engineering in Water & Environment le Engineering Specialising in Irrigation le Agricultural Drainage.
“Likolo tsa mesebetsi ea matsoho tsona li tlo kenya mangolo a Air Conditioning & Refrigeration, Paramedics le Private Security.” O tsoela-pele.
“Re tla tsoela-pele ho tšehetsa thuto e sa lefelloeng likolong tsa mathomo ‘me re behelletse M238 milone ka thoko ho e tšehetsa. Re tla boela re ahe matloana likolong tsa ‘maloa tsa litereke tsa Quthing, Maseru, Mohale’s Hoek, Berea le Leribe ka chelete e M110.4 milone.
“Re behelletse M2.5 bilone bakeng sa ho ntlafatsa thuto likolong tse mahareng le litsing tsa thuto e phahameng.
“‘Muso o tlo nyolla litsiane tsa bana ho tloha ho M120 ho ea ho M200 ka khoeli. Litsiane tse fanoang ho batho ba nang le bokooa e tlo nyolloa ho tloha ho M400 ho isa ho M600. Palo ea bana ba likhutsana ba fuoang lihlapiso e tlo nyolloa ho tloha ho 26,400 ho ea ho 36,000.
KHAHO LE TOKISO EA LITSELA LE MAROKHO
“Kakaretso e tla sebelisoa mererong ena ke M3.2 bilone ‘me ho eona M1.4 bilone e tla sebelisoa ho lokisa litsela le marokho literekeng tsena:
“Seterekeng sa Maseru ho tla ahoa borokho ba Mahlabatheng nokeng ea Korokoro ‘me ho lokisoe litsela tsa mabitso ana: Moshoeshoe Road, Kofi Annan Road le litsela tsa St. Michael’s ho ea Roma, Lepeli ho ea Thakeli le tsela e tlohang Maliele ho ea Mpeli. Katoloso ea tsela ea Mpilo le eona e tlo tsoela-pele.
Tokiso ea tsela ea Mpilo, Maseru
“Seterekeng sa Mafeteng ho tla lokisoa borokho ba Tsoaing. Mohale’s Hoek ho tla ahoa tsela e tlohang Tsoloane ho ea Ha Khitšane ho phunyeletsa Liphiring. Ho tla boela ho ahoe marokho a maoto; Mokhasi, Luka, Ramosothoana-Ralimpe, Sefateng-Baruting, Ntlhasinye Makhetheng, Ntja-Jobo le Thabantšo-Moiketsi.
Quthing ho tla lokisoa litsela tsa Pali ho ea Leihloana, Malibeng ho ea ‘Mone le Pulane ho ea Sekokoaneng.
“Ka Thaba-Tseka teng ‘muso o tla lokisa tsela ea Kou ho ea Motau hammoho le ho aha tsela ea bolelele ba 60KM ho tloha Katse ho ea Thaba-Tseka. Ho tla boela ho ahoe tsela e kopanyang Mokhotlong le Thaba-Tseka.
“Tsela ea ‘Malesaoana ho ea Butha-Buthe e tla lokisoa ekasitana le ho lokisa tsela lipakeng tsa Hlotse le Pitseng ka ho lokisa lik’holoboto tsa Sebothoane le Khanyane. Ho tla boela ho lokisoe litsela tsa Kepi ho ea Telukhunoana, Berea.
“Mokhotlong ho tla lokisoa tsela ea Nyokololi ho ea Tiping.” Dr. Matlanyane o li beha joalo.
