PUO EA TONA-KHOLO MACHABENG A KOPANENG
Ka moqolotsi oa rona
La 24 Loetse 2023
Mokhatlo oa Machaba a Kopaneng (United Nations – UN) o tšoere seboka sa lihlooho tsa linaha sa tulo ea 78 (United Nations General Debate, 78th Session) mane New York, Amerika.
Tona-kholo ea Lesotho, Sam Matekane o bile teng ’mokeng ona le moifo oa hae oa matona le liofisiri tse ling tsa ’muso. Ha a ts’etleha puo maoba, o babalitse Machaba a Kopaneng ka mekutu ea khotso ho tloha likharurung tsa ntoa ea pele ea lefatše.
O rapalalitse hore nalaneng ea lefatše UN e siile menyabuketso e ke keng ea hlakoha. Leha ho na le likatleho tse ngata, o itse UN esale e thulana le liphephetso tse ngata.
Moifo oa tona-kholo Matekane o apere likobo ‘mokeng [Image: UN]
“Joalokaha eka ha ho’a lekana, ho liuoa hoa mebuso ho seng molaong oa motheo ho boetse ho ropohile hape ‘me borabele le bokhukhuni li itsoella-pele.
“Mohlomphehi president ea seboka, Ha maemo a le tjee, potso ke hore na u tlisa tšepo joang ho lichaba sa lefatše?” Matekane o qholotsa bookameli ba UN.
O tobokelitse hore leha ho le joalo o’a tseba hore UN e ntse e le matla ho tloha ha e thehoa ka 1945. Matekane o ipilelitse ho lihlooho tsa mebuso hore litaba li matsohong a bona ho fetola maemo a tlhokahalo ea khotso a renang lefatšeng.
O itse o nanela mohoo oa seboka sena e leng “Rebuilding Trust and Re-igniting Global Solidarity”. O itse ho bohlokoa ho lihlooho tsa linaha ho akofisa meoloane ea moshoelella (Sustainable Development Goals – SDGs) molemong oa ho tlisa khotso lefatšeng ekasitana le ho nyolla moruo oa lefatše.
Har’a mathata a tobileng lefatše ka maemo a tetemang a moruo o bontšitse hore mehato ea ho tsoellisa-pele li-SDGs e khitlile lejoe ka lebaka la bofuma, tlhokahalo ea mosebetsi, bophelo le thuto tse maemong a mabe hammoho le mafapha a mang.
“Linaha tse ntseng li hola moruong joaloka Lesotho li tsuong e tšabehang kaha ke hona li ntseng li batla ho phunyeletsa ho fihla mebarakeng ea lefatše.” O rialo.
Ho khutlisa maemo, linaha li tlameha ho tšoarana ka matsoho ebile li ipapisitse ka litšiea tsa mantlha tsa metheo ea UN. A re lihlooho tsa linaha li lokela li atamele taba ena ka maikutlo a pholileng haholo tabeng ea kanetso ea lichelete.
“Ho hlokahala hore re be ntsoe-leng ho tebisa metso ea temokrasi le ho hlopha bocha mekhatlo ea Bretton Woods Institutions. Ho feta mona, Lesotho le tla lula le tsoela-pele ho tšehetsa kopo ea mongoli-kakaretso oa UN ntlheng ea tsosoloso ea SDGs. Hape re boela re thatiselletsa lentsoe la rona ho linaha tsa G20 hore li akhele bonyane 500 bilone ka selemo ho tsosolosa litšiea tsa meoloane ea li-SDGs.” O tekela seboka joalo.
Matekane o boetse o kopile hore chelete ea lithuso e ka fanoa ho linaha tse e hlokang ka mekhahlelo e fapaneng. A supa hore boitlamo bo entsoeng ke linaha bo lokela ho phethahatsoa kahohle-hohle.
“Re boela re ananela qeto ea linaha tsa G20 ho amohela African Union e le setho sa molao mokhatlong oo. Leha linaha tsa rona li le kojoana li mahetleng, ha re a lula feela ho shebella ha maemo a senyeha.
Tabeng ea ho bona hore meoloane ea ntlafatso ea moshoelella e ntšetsoa-pele, Matekane o fane ka tlaleho hore naha ea habo e ile ea tšoara ‘moka oa phepo le lijo. A tlaleha hore ‘moka oo o tšoeroe ka Tlhakubele monongoaha tlas’a keta-pele ea Motlotlehi Letsie III.
“Sepheo sa ‘moka e ne e le ho matlafatsa khokahano ea sepolotiki e le ho batla lithuso khahlanong le tlala le phepo e fosahetseng Afrika. Re ntse re leka ka matla ho thusa hore meoloane ena ea ntlafatso ea moshoelella e atlehe.
“Likhoeling tse peli tse fetileng, ke ile ka sebetsa le ofisi ea UN mane Lesotho ‘me ka thakhola ‘UN Sustainable Development Corporation Framework’ e reretsoeng ho akofisa 2030 agenda bakeng sa ntlafatso ea moshoelella.”
O itse leha ba thoholetsa nanabetso ea UN tabeng ena, ho ntse ho na le likhaello tse ngata. “Ka lebaka lena re ipiletsa ho balekane ba rona ntlafatsong ho thusetsa ka lichelete tse ling molemong oa ho phethela tšebetso.
O boetse a thetsa hape taba ea kotsi e tlisoang ke phetoho ea leholimo eo areng e tlisa maholiotsoana, lifefo le lipula tsa likhohola. A re litholoana tsa phetoho ea leholimo ke tlala ea boja-likata, mafu le tlhokahalo ea mesebetsi haholo bacha.
“Ho reketla hoa lefatše Morocco le meroallo e otlileng Libya ke bopaki ba sena.” Matekane o rialo a bile a fetisa matšeliso ho ba lahlehetsoeng ke baratuoa ba bona likoluoeng tseo.
O itse leha mathata a phetoho ea leholimo a tlisa litsietsi, empa o na le tumelo ea hore holimo sepakapakeng ba ka fumana melemo e mengata
“Lesotho mane re na le metsi, moea le letsatsi ka bongata. Lihloliloeng tsena li ka re thusa ntlheng ea boqapi ka tšebetso-‘moho ho theha mesebetsi ka ho fehla matla a sa feleng ka lihloliloeng tseo ke li boletseng.
“Ha ke le mothating ona, ke lakatsa ho phatlalatsa hore ka la 12 – 13 Mphalane 2023 Lesotho le tla tšoara ‘moka oa metsi le hydrogen. Ho tla boela ho be le lipontšo moo ho tla pepesoa hore re naha ea pele e tla fehla matla ekasitana le ho hlahisa mesebetsi ka matla a sa feleng kaha re tla be re le first sustainable digital hydro nation.
“Mona re buletse bo-ramatsete ho kenella, ‘me ke nka monyetla ona ho le memela ‘moka ona bahlomphehi ekasitana le lona mafapha a ikemetseng linaheng ka ho fapana ho ba teng ‘mokeng ona oa bohlokoa. Sepheo sa rona ke ho fehla motlakase o hloekileng bakeng sa tšebeliso malapeng le ho rekisetsa linaha tsa boahelani motlakase ona.”
Tona-kholo e boetse ea ipiletsa ho linaha tse kholo ho thusa linaha tse holang moruong ho latela tumellano ea Paris. A re ho lokeloa ho thusoe batho ba nang le bokooa, bacha le batho ba tlokotsing.
A re ba ithutile ka seoa sa Covid-19 hore thekenoloji e ka sebelisoa ho loantša mafu. A bontša hore linaha tsa lefatše li lokela ho tšoarana ka matsoho mothating ona e le ho bona hore bohle ba fumana meriana nakong ea bokuli.
“Ke thabile ho tlaleha mona hore Lesotho, tšebeliso ea tekhenoloji e fahlollotse ba bangata mahlo haholo banana le basali hore ba tsebe litokelo tsa bona. Taba ena e bonahala moo lihlopha tsena li nang le bolokolohi ho hlahisa maikutlo hohle.
Leha hole joalo, o supile hore libakeng tsa mahae qholotso e ntse e le teng ea ho fihlela marang-rang a thekenoloji ka lebaka la tlhokahalo ea lisebelisoa tseo. A re ba ka fenya bothata bona ka thusano le bo-‘mphato ba Lesotho.
A boela a beha ngongoreho ea hae hore leha ba ananela tšebeliso ea marangrang a thekenoloji le mahlale-a-maiketsetso (Artificial Intelligence) feela ho bohlokoa ho lemoha qholotso ea tšebeliso ea tsena tabeng ea polokeho le tšireletso.
Matekane o boetse a tlaleha hore Lesotho le leetong la ho phethela litlhopho-bocha lefapheng la molao oa motheo le paramente. A toboketsa hore hang ha ba phethetse litlhopho-bocha, ho tla ba le botsitso ba sepolotiki naheng ea habo. A re leha ho le joalo, ho phethela tšebetso ena, ba tla lula ba itšetlehile ka balekane ho tsoa United Nations.
A boela a thetsa qholotso ea lithunya tse nyane tseo a reng li tletse hohle. O boetse a bua ka libetsa tse kotsi tsa linaha tse kholo ka li-nuclear.
“Biological and chemical weapons still exist. Ka lebaka la libetsa tsena khotso ea lefatše e tla lula e tetema e le tsietsing.” Ke eena a lla ka lithunya le libetsa tse kotsi.
O ile a tiisetsa ‘moka hore Lesotho le tla lula le thusetsa ho bona hore khotso e ea rena linaheng tsa boahelani e leng tsa SADC, “Ke motlotlo ho tlaleha mona hore masole a rona Mozambique tlasa sekhele sa SADC a entse tšebetso e babatsehang ho tlisa khotso naheng ea Mozambique moo ho ileng hoa itšema marabele a kotsi.
“Ha re bua ka khotso kamehla, ha rea lokela ho lebala tlokotsi ea Sechaba sa Sahrawi, le sechaba sa Palestina se lulang tlasa khatello ea Israel ‘me re hlokometse hore Lefapha la Tšireletso la Machaba a Kopaneng esale le loanela boipuso ba bao.
A ipiletsa hore Western Sahara e lokela ho iphumana ka boipuso le hore e tle e phele ka khotso le Morocco. A boela a supa hore ho lokela ho be le tharollo lipakeng tsa Palestina le Israel hore linaha tseo li tle li phele ka khotso.
O phethetse ka ho kopa hore UN e hlakole likotlo-qobello tseo esale e li petlenya khahlanong le Cuba hammoho le Zimbabwe.
