‘MUSO O BATLA SETOPO SA MOBISHOPO SE EPOLLOE
Leihlo la Basotho
La 13 Pherekhong 2024
Mobishopo oa mehleng oa Kereke ea Chache (Anglican Church of Southern Africa) mofu Adam Mallane Taaso o ile a timela ka la 9 Tšitoe 2023 ‘me lelapa la epela setopo sa hae mabitleng a lelapa kahar’a jarete ea hae Tšehlanyane, Leribe ka la 16 Tšitoe 2023. Har’a ba bileng lepatong leo e bile Motlotlehi Letsie III ea ileng a babatsa bosebeletsi bo khabane boo mofu Taaso a bo bontšitseng ho kereke.
Ho sa le joalo, ho ropohile khang ka lebitla la Mobishopo Taaso kaha lekala la Puso ea Libaka le Borena, Lekala la Lehae le Sepolesa ka Lekhotla la Puso ea Libaka la Tšehlanyane le hlahletse nyeoe Lekhotleng le Phahameng la Leribe le batla hore lekhotla le laele hore masapo a Mobishopo Taaso a epolloe lebitleng le kahara jarete ‘me a epeloe bocha mabitleng a motse Tšehlanyane.
Ho ea ka lipampiri tsa qoso, Lekhotla la Puso ea Libaka la Tšehlanyane le re lelapa la Taaso le tlotse molao oa Bophelo bo Botle oa 1970 (Public Health Order, 1970) ka ho boloka mofu sebakeng se sa tšoaeloang mabitla ka molao. Molao ona o tataisa sechaba hore litša tsa mabitla e lokela e-be tse tšoailoeng ka molao.
Temana ea 72 ea Public Health Order, 1970 e re litša tsa mabitla li tla tšoauoa ka tsela e latelang: “E tla ba molao hore letona le hloaee libaka tse itseng kahara naha ea Lesotho e le tsa mabitla. Sena letona le tla se etsa ka ho phatlalatsa kasete ea litša tse joalo.”
Temana e latelang ea 73 e re litša tsohle tsa mabitla tse neng li se ntse li le teng ha molao ona o fetisoa li tla hlohonolofatsoa ke letona ka ho phatlalatsa kasete ea litša tseo. Kamora hore letona le phatlalatse kasete litša tseo li tla nkoa e le mabitleng ka molao.
Ho sa le joalo lelapa la Taaso le re le epetse mofu oa lona mabitleng ao e leng khale a tšoauoe kaha ho na le bafu ba bang ba lelapa hona moo.
Mora oa mofu a buisana le koranta ea The Post, Adv. Taaso o hlalositse hore ntat’ae o na le jarete e kholo ‘me karolo ea eona e tšoaetsoe setša sa mabitla. “Setša seno ke sa lelapa sa mabitla, esale se tšoauoa khale haholo.” Taaso o rialo.
O tsoela-pele: “Lelapa leso le qalile ho sebelisa sebaka seo ho bolaka bafu ka 1963, e leng lilemo tse supileng pele molao ona o fetisoa. Haesale bafu ba rona ba ntse ba epeloa mono ‘me ke lekhetlo la pele re utloa re thibeloa ho boloka mofu mabitleng ano.” O li beha joalo.
O menyelelitse litaba tsa hae ka tletlebo ea hore lelapa la bo lea khetholloa kaha malapa a mang esale a itsoella-pele ho epela bafu mabitleng a kahara majarete a bona ‘me ha ho e-s’o be motho ea reng letho ho malapa a joalo.
– The Post, tlaleho e ‘ngoe ka Leihlo la Basotho News
