MOTJOLI OA LESOTHO O AHLOLOA HO TORONKA BOPHELO BOHLE RSA
La 11 Mphalane 2023
Lekhotla la ‘maseterata la Tikoloho ea Mount Fletcher, Eastern Cape, le ahloletse molisana oa Lesotho, Katleho Mpakanyane (20) ea neng a sebetsa Mangolwaneng, Mount Fletcher, a lisa liphoofolo ho hlola toronkong bophelo bohle ba hae kamora ho mo fumana a le molato oa peto ea mosetsana, teko ea polao le bokhosheli.
‘Maseterata Sello Mokotjo o lihetse kahlolo hore bakeng sa peto, moqosuoa o tla hoehla bophelo bohle, hammoho le lilemo tse 15 bakeng sa teko ea polao le tse hlano tsa bokhosheli ka likhoka.
Bopaki bo tekiloeng kapele ho lekhotla bo supa hore ka la 7 Motšeanong 2023, Mpakanyane o ile a khaoletsa mosetsana ea neng a tsoa tameneng e ‘ngoe sebakeng seo. Bopaki bo re nakong eo mosetsana a fihlang lapeng ha bo, o ile a hopola hore senotlolo sa ntlo ea bo se ha moahisani oa hae ‘me a leba teng ho se lata.
Ha a le tseleng, ke moo a ileng a utloa ntho e mo tšoara ka mahetleng, eitse ha a re hepu! a bona thipa e se e le molaleng oa hae.” Ho rialo raliphatlalatso oa Lefapha la Bochochisi, Luxolo Tyali.
Ho ea ka Tyali, Mpakanyane o ile a qalella ho nyekenya lehlatsipa ka thipa ka mahetleng a ntse a mo suthumetsa eaba le oela ka fatše ka sefahleho. Ke moo a ileng a le fetola hore sefahleho se shebe holimo a ntse a le hlabaka ka thipa sefahlehong le molaleng.
“O ile a mo beta a mo behile thipa molaleng ‘me ha a qetile a secha lipokotho tsa hae eaba o fumana founu, a e nka a nt’o baleha a siea lehlatsipa le rapalletse fatše kahar’a letamo la mali.” Tyali o itsatso.
Sepolesa se ile sa thakhola lipatlisiso ‘me sa tšoara Mpakanyane le ho mo hlahisa khotla ‘me a ipolela a le molato liqosong tseo kaofela.
Mochochisi Zonke Maranjana o ile a kopa lekhotla ho pitla Mpakanyane ka kahlolo ea bophelo bohle chankaneng ‘me ‘maseterata Mokotjo o ile a lumellana le eena eaba o ribela Mpakanyane ka kahlolo ea ho hlola bophelo bohle chankaneng hammoho le lilemo tse 20 tsa teko ea polao le bosholu ba founu ea lehlatsipa.
Hlooho ea Bochochisi Eastern Cape, Barry Madolo, o re ba khotsofetse ke kahlolo ena ‘me a thoholetsa sepolesa le bochochisi ka mosebetsi o motle.
– AOL
