MOCHOCHISI O RE MOPARAMENTE A TŠOAROE
Ka Moipone Makhemeng
La 25 Mphalane 2023
Monna oa Mosotho, Mokherane Tsatsanyane (48), oa Lower Thamae Maseru, eo e leng moparamente oa khekhethane oa Democratic Congress (DC), o qosoa lekhotleng la ‘maseterata oa Maseru ka tlolo ea molao.
Ho ea ka lengolo la qoso, moqosuoa ka maikemisetso, ka la 22 Tšitoe 2022, o ile a khakhatha e mong Tšepang Phangoa ka ho mo kenya makotofa ba le haufi le boemelo ba libese Maseru.
Ho ea ka lipampiri tsa Lekhotla, ka la 22 Tlhakubele 2023, moqosuoa o ile a hlaha lekhotleng ka pele ho ‘maseterata Thamae Thamae ‘me a balloa qoso a ba a lokolloa ka beile. O bile a laeloa ho itlaleha khotla ha lekhotla le mo hloka. Ho feta mona, o ile a laeloa ho se kena-kenane le lipaki tsa mofapa-hlooho.
Ho ea ka tokomane ea lekhotla (eo koranta ena e nang le eona), moqosuoa kajeno, la 25 Mphalane 2023, o sitiloe ho iponahatsa khotla leha lipaki nyeoeng ea hae li ne li le teng.
Kahona, mochochisi Lefu Ratšita o kopile tumello ho lekhotla hore le laele hore moqosuoa a tšoaroe. Nyeoe e tla tsoela-pele ka la 27 Pulungoana 2023.
