MOAREKA-BISHOPO O HLALOSA TLHOHONOLOFATSO EA BATHO BA BONG BO TŠOANANG
Ka Moipone Makhemeng
La 25 Tšitoe 2023
Kereke e K’hatholiki ka Hlooho ea eona, Mopapa Francis, ka la 18 Tšitoe 2023, e lokollotse phatlalatso e lumellang ka molao hore Baprista ba K’hatholiki ba hlohonolofatse batho ba keneng kopanong ea lenyalo la batho ba bong bo tšoanang (same sex union).
Leha ho le joalo, phatlalatso e bonahala e bakile pherekano mahareng a sechaba kaha batho ba bang ba sa e utloisisi. Kahoo, e le ho otlolla litaba tsena, moifo oa Leihlo la Basotho News o ile oa etela Mobabatsehi Moareka-Bishopo Tlali Gerard Lerotholi ho manolla phatlalatso ena.
Mobabatsehi o hlalosa hore seo Mopapa a se phatlalalitseng ke hore ho hlohonolofatsoe batho ba bong bo tšoanang e le ‘libopuoa tsa Molimo’. O hlakisa hore ha ho hlohonolofatsoe ‘lenyalo’ kapa ‘kopano’ ea batho ba joalo. O ile a beha hore Kereke e K’hatholiki e ntse e tsitlalletse hore lenyalo le setse le eme e le kopano ea monna a le mong le mosali a le mong.
“Ke tšoere tokomane e buang ka phatlalatso ena ‘me e re: ‘Ha ho letho le fetoloang thutong ea Kereke e K’hatholiki ka moo lenyalo le leng ka teng. Taba ena e itšetlehile holim’a litlhohonolofatso tse supileng tsa kereke ka tsela ea Sakaramente. Mona re tla bua ka Sakaramente ea Tlhatsuo, Sakaremente ea Tiiso, Sakaramente ea Lenyalo, Sakaramente ea Pako, Sakaramente ea Peho ea Baprista, Sakaramente ea Tlotso ea Bakuli le Sakaramente e Amoheloang ea Eukarist.” O rialo.
Moareka-Bishopo Tlali Lerotholi o hlalosa mefuta ea litlhohonolofatso
Leha ho le joalo, Mobishopo o re ho na le tlhohonolofatso e akaretsang eo motho a ka ikopelang eona. A re ha ho fanoa ka tlhohonolofatso e joalo, e fanoa ntle ho lipotso tsa letho.
O boetse a bua ka litlhohonolofatso tseo kereke e li bitsang ‘irregular blessings’ e leng litlhohonolofatso maemong a sa tloahelehang. Mona o tehile mohlala ka tlhohonolofatso ea batho ba hlaliloeng kapa ba hlalileng kapa bao bana ba bona ba shobelisitseng kapa shobelisitsoeng e le litho tsa kereke. Ka hoo a bontša hore batho ba bong bo tšoanang ba kenelletse har’a bao.
E le ho thophothetsa kutloisiso, Moareka-Bishopo, o thatisellelitse ka hore taba ea tlhohonolofatso ea batho ba bong bo tšoanang e hlaha temaneng ea litlhohonolofatso tsa batho ba sa tloahelehang e leng “irregular blessings” ka moo kereke e ba bitsang ka teng.
Moareka-Bishopo Tlali Lerotholi o re Kereke e K’hatholike e nka lenyalo e le kopano ea monna a le mong le mosali a le mong
“Ha ho moo tokomane ena e buang ka ‘same sex marriage’ empa e bua ka ‘same sex union’. Ke ka morero le sepheo hobane Kereke e K’hatholiki e ntse e tiisa hore lenyalo ke tlamahano kapa selekane lipakeng tsa monna a le mong le mosali a le mong ba ikemiselitseng ho amohela bana ba tla hlaha lenyalong la bona.” O itsatso.
Mobabatsehi o tiisa hore Kereke e K’hatholiki ha e na matla a ho hlohonolofatsa kapa ho tiisa lenyalo la batho ba bong bo le bong kaha e nka kopano eo e se lenyalo.
O totobalitse hore ha batho ba bong bo tšoanang ba ea ho Moprista ba tsoa tiisa lenyalo sebakeng se seng, ba ka kopa tlhohonolofatso. Sechaba se hlokomele hore tlhohonolofatso e joalo bao ba e fuoa e le batho kapa libopuoa tsa Molimo. “Re tla be re hlohonolofatsa batho bao empa e seng lenyalo.” O e beha joalo.
Empa ha e le monna le mosali ba nyalanang, kereke e tla etsa ka mantsoe le lipontšo tse lokelehang ho tiisa le ho hlohonolofatsa lenyalo le joalo.
Ha a fera, Mobabatsehi Lerotholi o re phatlalatso e entsoe molemong oa hore batho ba behelletsoeng ka thoko ho kereke, ka ho tloha litšoanelong tsa bona, ba se utloe ba khetholloa ke Kereke. A re batho ba bang ba ikhethetse ho furalla Kereke hoba ba ne ba nka Kereke e ba lahlile.
Ho sa le joalo, Seboka sa Babishopo ba Kereke e K’hatholiki Afrika e ka Boroa (Southern African Catholic Bishop’s Conference) se ntšitse polelo e hlakisang phatlalatso holima tlhohonolofatso ea batho ba bong bo tšoanang ka la 21 Tšitoe 2023. Polelo e re: “Ha ho motho ea ka thoko ho mohau oa Molimo, kahona batho ba keneng likamanong tsa bong bo tšoanang ba ke ke ba haneloa ho fuoa tlhohonolofatso ha ba e kopa. Tlhohonolofatso e joalo, e nkoa e le monyetla oa ho fumantša bao mohau oa Molimo hore ba tle ba sokolohe, ba be ba kene maipolelong hore ba tsebe ho fumana tataiso ea Molimo. Tlhohonolofatso e etsoa molemong oa hore batho bao ba sokolohe empa ha e bolele ho tiisa kapa ho lumellana le ‘manyalo’ a batho ba bong bo le bong.” E baleha joalo polelo ea Seboka.
Polelo ea Seboka e boela e hatella hore batho bohle ho sa tsotellehe bong ba bona, ba tlameha ho hlomphuoa le ho baballa seriti sa bona sa botho e le bana ba Molimo. E re bohle ba lokela ho ikutloa ba amohelehile kahar’a kereke ba bile ba sa khetholloe.
