MAPOLESA A THIBELOA HO EA JOALENG BOSIU
Ka moqolotsi oa rona
La 7 Tšitoe 2023
Bookameli ba sepolesa sa Lesotho bo petlentse molao-taelo o mocha oa sepolesa (Standing Order No. 1 of 2023) o thibelang litho tsa sepolesa ho bonoa matlong a thekiso ea mothamahane lihoreng tsa bosiu ho ea hoseng. Litaba tsena li hlahelletse lengolong la bookameli le potolohang le litereke.
Ho ea ka molaoana ona nakong ea matšolo a sepolesa bosiu, ha ho lepolesa lefe kapa lefe le lokelang ho fumanoa sebakeng sa sechaba sa thekiso ea mothamahane lipakeng tsa 10pm le 6am ntle leha lepolesa kapa mapolesa a joalo a le mosebetsing libakeng tse joalo. Bookameli bo hlokomelisa liofisiri tsa sepolesa hore ea tla hloloa ho ikobela taelo ena o tla nkeloa likhato tsa molao.
“Liofisiri li boela li hopotsoa hore li lokela ho boloka seriti se setle sa sepolesa ka linako tsohle hammoho le ho bontša boitelo mosebetsing e le ho boloka seriti se setle sa sepolesa.” Lengolo le rialo le tekenetsoeng ke Superintendert S.J Ramorou ea sebetsang lefapheng la khiro ea sepolesa.
Ho sa le joalo, puisanong le Leihlo la Basotho, raliphatlalatso oa sepolesa, Senior Superintendent Kabelo Halahala, o tiisitse hore lengolo le hlalosang likateng tsa molao ona o mocha ke ‘nete feela a re lengolo leo le lebisitsoe ho mapolesa.
