MACHESETSA O PHAHLOLA MERERO EA MATEKANE EA ‘SEKHUKHU’
Ka Moipone Makhemeng
La 28 Loetse 2023
Moetapele oa Basotho National Party – BNP) Machesetsa Mofomobe, o re tona-kholo Sam Matekane le matona a mang ba ntse ba rera merero ea sekhukhu. Seo Mofomobe a se makallang ke hore bo-Matekane ba sebelisa sebaka sa khubu ea puso e leng Qhobosheaneng ho tsamaisa merero le meralo ea bona ’moho le metsoalle ea bona ba le tlasa sekhele sa Lets’olo la RFP e leng se silafatsang sebaka se hlomphehang sa puso. Sena o se buile maobane ’mokeng oa litaba Ntlo-Kholo ea BNP Maseru.
Mofomobe o boetse a ts’oela ka mathe boits’oaro boo a bonts’itseng bo sa nepahala hore ebe litokomane tsa ’muso li ntse li ts’oaroa ke batho ba sa fuoang tumello ka molao. O itse e le Manashenale ha ba na khang ha bana ba Basotho ba hiroa empa o re ho lateloe methati e nepahetseng. O totobalitse hore ho akheloe letlooa ha thentara e le teng e le hore bohle ba nang le khahleho ba akhele likopo tsa bona ho qhothisana lehlokoa.
Litaba tsena o re o li buoa tjena ka lebaka la hore ho ile hoa ba le banna ba ileng ba ts’oara ’moka Qhobosheaneng ba ileng ba itlhalosa e le lihloela tsa Tona-Kholo. O re banna bao mosebetsi oa bona ke ho bona hore pono ea hae ka puso e ea fihleleha. O behile pooaneng hore seepa-pitso mohla letsatsi leo e ne e le molekane oa letona la Likhokahanyo, Mahlale, Boqapi le Ts’ebeliso ea Mahlale mohlomphehi Nthati Moorosi.
Ho feta mona, o re o makalletse ho khutsa hoa Tona-kholo ka tahlehelo ea mesebetsi lifemeng tsa liaparo kaha maemo a tjena a mo tlama ho tsoa puo. A re ha ho na mobusi ea ka khutsang ka maemo ana a hlobaetsang empa ho bonahala o ne a ipatlela lipalo tsa Basotho feela kaha a rata ho ba phelisa ka leshano le ho ba fa ts’epo e sieo.
O boletse hore feme ea Hippo Knitting e sa tsoa fokotsa basebetsi ba 700 ’me hape le beke e tlang feme ea Nien Hsing e tla nyaola Basotho ba 500 ’me Tona-Kholo esale e ts’episa ho bula lifeme empa leha joale ha ho e-s’o be nko ho tsoa lemina.
Moetapele oa Manazi o boetse a utulla hore Tona-Kholo le letona la lihloliloeng mohlomphehi Mohlomi Moleko ba na le bokhukhuni boo ba ntseng ba bo etsa ‘me o re o na le lirekoto tsa lipuisano tsa Moleko ha a ntse a kena lipuisanong le lehlakore le leng.
“Tsa mo batla hore na matona ana holim’a lihora tse robeli tsa mosebetsi hore na tse ts’eletseng ha ba etse private deals tsa bona na. This is the biggest state capture, Lesotho has ever seen. Eane ea Gupta ke ngoana. Ha press conference ena e fela le tle le ee on my Facebook page. Ke tlo beha conversation ea letona Moleko le motho eo ho thoeng ke Khumalo oa South Africa moo ba botsanang na chelete e kenngoe akhaonteng ea Tona-Kholo na?
“Joale ebile Moleko o re e kenngoe akhaonteng ea Tona-Kholo hobane eena ho lula ho kena chelete tse ngata ha e na belaetsa. Ebile ho thoe ‘na u se u buile le maparamente’. Ba lumela hore ba bang ba tla lumela Tona-Kholo o tla ba kholisa.” O li beha joalo.
Ntlha ea ho qetela, Mofomobe o re ka la 7 Loetse 2023, ho kene banna ba tlo etsa ‘hack’ mehala ea baokameli ba litsi tsa ts’ireletso, maparamente, baahloli le batho ba nkoang ba le kotsi ho puso. A re ketso ena ke tlolo ea molao ho etsa joalo ntle le tumello ea baahloli ’me le bona ba tlo sitoa ho etsa mosebetsi ka bolokolohi. O bile a ipiletsa ho Basotho ho tsoma batho bana hoba ba teng kahare ho naha ena Maserfu e leng Katlehong le Ha Thetsane kaha e hatikela litokelo tsa Basotho.
“Ba tsoa Afrika e ka bophirima, ba bile le phutheho le matona a mararo, a itseba matona ano ao ke buang ka ’ona. To hack lifono tsa batho without a court order, Setsi sa Toants’o ea bobolu (DCEO) sepolesa, mautloela a ka kholisang lekhotla hore taba e joalo e ka khona ho etsahala hobane litokelo tsa rona li tintelitsoe ka hare ho molao oa motheo.” O phethela joalo moetapele oa BNP.
