MACHESETSA, SHALE BA TABANYA MATEKANE KA NYEOE
Ka Moipone Makhemeng
La 20 Phuptjane 2023
Moetapele oa Basotho National Party (BNP), Machesetsa Mofomobe le motlatsi oa seboholi oa Democratic Congress (DC), Moeketsi Shale ba ile ba hlahlela nyeoe Lekhotleng la Molao-oa-Motheo ba tseka hore tona-kholo le mautloela ba se nke mehala ea bona.
Ka la 17 Motšeanong 2023, Mofomobe o ile a fuoa samane e mo laelang ho fana ka lifono tsa hae ho mautloela empa a hana ka tsona. Baromuoa ba tšireletso ba ile ba khutla a sa ba fa tsona lapeng ha hae, Ha Thetsane, Maseru. Ka le hlahlamang o ile a mathela khotla ‘me lekhotla la fana ka taelo ea nakoana ho thibela mautloela ho nka lifono tsa hae.
Shale eena o ile a fumana samane ka la 18 Motšeanong 2023 ‘me a nehelana ka lifono tsa hae kamora ho eletsoa ke ‘muelli oa hae. O ile a lieha ho hlahlela nyeoe kaha a ile a e hlahlela ka la 22 Motšeanog 2023. Mona o ne a tseka hore lifono li khutle. Leha ho le joalo, moahloli Sakoane o ile a re kaha o nehelane ka tsona ka keletso ea akhente ea hae ekakhona li tsoe li le ho mautloela.
Shale o nts’a maikutlo kamora ho hlola nyeoe
Mabaka a ho nka mehala ea Mofomobe e ne e le hore o fuoa makunutu a Mautloela ke e mong Ithabeleng Pitso, ho belaelloa lefung la seboholi Ralikonelo Joki hammoho pelaello ho ameha botlokotsebeng ba ho hlatsoa chelete.
Shale eena o ne a belaelloa hore o fuoa makunutu ke liofisiri tse ling tsa mautloela ekasitana le ho nkha lefotha polaong ea Joki.
Balli ba kopile lekhotla ho lahlela matjoing temana ea 26 ea molao oa mautloela ka le reng e khahlanong le molao oa motheo. Hape ba batla hore lekhotla le phatlalatse ho nkoa hoa mehala ea bona ka samane e le khahlanong le litokelo tsa bona tsa mantlha tsa botho. Ba boetse ba re seo ke ho kena-kenana le makunutu a bona. Khang ea bona ke hore ba sirelelitsoe ke molao oa motheo ka temana ea 17. Tseko ea ho qetela, ba batla hore lekhotla le phatlalatse samane eo e le ka thoko ho molao.
Moahloli Sakoane o ile a bala kahlolo, a ipapisitse le litšiea tsa likhang tse latelang: hore na lisamane li fanoe ka tsela e nepahetseng ho ea ka molao, hore na letona le tekenetseng samane (Limpho Tau) le ne le na le tokelo ea ho etsa joalo kapa che. Balli ba re mabaka a fanoeng lisamaneng ha a utloahale. Ba ne ba kopa lekhotla hore le hlahlobe hore na lisamane tseo li nepahetse mahlong a molao.
Ntlheng ea tšireletso ea makunutu a motho ka mong, moahloli o ile a tšoaela hore ‘muso o ka khina makunutu a itseng haholo ntlheng ea poloko ea molao kapa tšireletso ea naha.
Sakoane o supile hape hore lipakeng tsa tona-kholo le letona Tau, ha ho ea phephelitseng nyeoe ea balli.
“Ke fumana letona Tau a ne a sa laeloa ke tona-kholo ho tekena lisamane tseo. Kahona, ke nka phano ea lisamane tsena e entsoe ka thoko ho molao.” Sakoane o li beha joalo.
Ha a khobotla taba eo hlooho ea mautloela e reng Mofomobe o fuoa makunutu a boutloela, o re ha ho moo mookameli oa mautloela a hlakisang hore na makunutu ao ke a boemo bofe hoo a ka bang le kotsi tšireletsong ea naha.
Baahloli ba neng ba mametse nyeoe; ‘Malebona Khabo, Sakoane Sakoane le Moneuoe Kopo.
“Nthoena ha e amohelehe ka mabaka a mabeli; la pele ho fosahetse hore moqosuoa a qhoaelle melaetsa ea WhatsApp mapaking a hae hore feela lekhotla le e bale. Melaetsa e meng ea WhatsApp ke e se nang thuso e sa hlokeng hore sechaba se e tsebe ebile ha e behe tšireletso ea naha tlokotsing joaloka puisano ea Mofomobe le Pitso ba ipuela ka litaba tse neng li il’o buuoa ka Senateng.”
Sakoane o itse tabeng ea ho amahanya Mofomobe le pelaello ea polao le ho hlatsoa chelete, o re mona ha ho mabaka a hlakileng hore eo hobaneng ho thoe ke ‘melaelloa.
Moahloli e moholo o ile a makala hore na mosebetsi oa mautloela ke ho tloha neng e le ho batla linyeoe tsa polao le ho hlatsuoa hoa chelete kaha oo e le mosebetsi oa sepolesa.
“Ho feta mona, ha ho hlake hore na ho bolaoa hoa motho a le mong le ho hlatsuoa hoa chelete ho sisinya tšireletso ea naha joang.” Ke Sakoane eo.
Ha a lahla malepe, o hlalositse hore leha litsi tsa tšireletso li sebetsa ‘moho ho sireletsa naha empa mautloela ha a lokela ho namela ka likobong tsa tšebetso ea mafapha a mang joaloka sepolesa kaha ke sona se fuputsang linyeoe.
Ha a tobana le taba tsa Shale, o tekile hore leha mautloela a re le eena a mo belaella polaong ea moqolotsi Ralikonelo Joki hammoho le ho amohela makunutu a mautloela, ha ho hlake hore o bone makunutu a boemo bo holimo, mahareng kapa tlaase.
“Ntlheng ea hore mautloela a ne a fuputsa polao lifonong tsa Shale, oo ke mosebetsi oa mapolesa.” Ho rialo Sakoane.
O bile a etsa mohlala hore mautloela a bontšitse a ne a se na maqheka a mang ho fumana hore na liofisiri tse ling tsa mautloela tse lutlisang makunutu ke life. A re boipotso ke hore na hobaneng ba sa sebelisa matsapa a tšoanang ha ba tla senola lebitso la Pitso e le ho fumana liofisiri tse ling tseo ho thoeng li lutlisa makunutu.
Baleteli ba DC le BNP lekhotleng kajeno
Ha a liha kahlolo, Sakoane o lahletse matjoing temana ea 26 (2) ea molao oa mautloela ka hore e hohlana le molao oa motheo. A boela a liha kahlolo hore ho nka mehala ea batho ho kena-kenana le makunutu a bona ‘me seo se ka thoko molao oa motheo.
“Ke laela hlooho ea mautloela le mautloela hore ba khutsise lifono tsa balli ‘me ho be ho hlakoloe melaetsa e neng e kopilitsoe lifonong tse neng li nkuoe.” Ho rialo Sakoane a tlatsane le baahloli Moneuoa Kopo le ‘Malebona Khabo.
Adv. Christopher Lephuthing o ne a buella Mofomobe athe Adv. Tempo Lesupi o ne a buella Shale. Ha Adv. Moshoeshoe a ne a le lehlakoreng la mofapa-hlooho.
