MACHAENA A QOSOA KA BOSHOLU ‘MOSHARENG OA NALELI FUNERAL
Ka Moipone Makhemeng
La 17 Pulungoana 2023
Machaena a mabeli le banna ba Basotho ba babeli ba hlahile lekhotleng la ‘Maseterata oa Maseru kajeno ba qosoa ka bosholu bo etsahetseng ka la 8 Pulungoana 2023. Baqosuoa ke ‘Mako Matsoso (39) oa Ha Moeketsi Mothobi, Ts’oeu Nkhets’e (37) oa Khubetsoana Ha Hlathe Majara le Machaena a mabeli, Dongye Thabo Yung (28) oa China ea lulang China Garden, Maseru le Qau Shein (39) oa China ea lulang China Garden, Maseru.
‘Maseterata Nkhethoa Molapo
Nyeoe e mametsoe ke ‘maseterata Nkhethoa Molapo ‘me ba balletsoe liqoso tse peli. Qosong ea pele ho thoe ka la 8 Pulungoana 2023 banna bana, ba hlometse ba ile ba hlasela le ho its’ohlometsa ‘moshareng oa Naleli Funeral Planners, Khubetsoana, Berea ‘me ba etsetsa litšoso mosebeletsi oa eona mofumahali Matšeliso Mathola.
Kamora moo ba ile ba utsoa chelete e kaalo ka M15,270 ka kakaretso, lifono tse tharo tsa moetso oa Huawei P40 Lite 5G ea boleng ba M7000, Nokia 105 ea boleng ba M300, Smart Kicka 5 sa boleng ba M800 hammoho Laptop ea Lenovo har’a tse ling.
Ba boetse ba qosoa ka ho fumanoa ba na le sethunya sa moetso oa 9mm se hlakotsoeng linomoro ebile se se na lengolo la molao. Ho boetse ho fumanoe mahlahahlela a leshome ka la 16 Pulungoana 2023 sebakeng seo baqosuoa ba mohlobo oa Machaena ba lulang – China Garden.
Baqosuoa ba tla hlaha khotla ka la 28 Pulungoana 2023. Banna ba Basotho ba buelloa ke Adv. Makhalanyane ha ba Machaena ba buelloa ke Adv. Mokhabi athe mochochisi oa nyeoe ke Adv. Sekoati Hlophe.
Ho sa le joalo, thepa e latelang eo e leng karolo la liponts’uoa lekhotla le lumetse hore e lokolleloe molli – Memory Stick le Monitor Sensor.
Baqosuoa ba theohetse chankaneng ‘me ba elelitsoe ho ikopela beile lekhotleng le phahameng kaha lena le se na matla a ho ba lokolla ka eona ho latela mofuta oa liqoso tse ba tobileng.
