LETONA LE PHATLALATSA TABA EA LIPEO LE MANYOLO
Ka Moipone Makhemeng
La 20 Mphalane 2023
Letona la Temo le Kanetso ea Lijo, Thabo Mofosi o entse phatlalatso kajeno ‘mokeng oa bo-ralitaba hore lipeo le manyolo li ntse li fihla ka bongata kahara naha.
Mofosi o bonts’itse hore ba qetile ho fepela litereke tsa maloting ka lipeo le manyolo. A bonts’a hore hajoale ba tla shebana le litereke tsa mabalane. O re lekala le itlhophile ‘me thepa e kena ka matla leha ho bonahala pula e entse hore batho ba mathele litsing tsa theko ka matla a maholo.
“Joale taba e kholo eo re tlo e otlolla ke pherekano e kholo e bonahalang ho lihoai ts’ebetsong-‘moho le tsona. Re na le mononts’a le lipeo tse ileng tsa fihla pele tsa litapole. “Hona joale ho ntse ho fihla menonts’a e jalang poone. ‘Me ke hona e ntseng e fihla ka sekhahla.” O rialo.
Leha ho le joalo, Mofosi o re ho na le litaba tseo ba li utloileng tsa hore lekala la temo le butse litoro mane li’a rekisa, feela joale ha ho na manyolo.
“Taba eno e ipaketsoe feela ke hobane lihoai li tla ka sekhahla se holimo haholo seo e reng ha thepa e fihla e tsamaea ka lebelo leo re neng re sa le nahana.”O teketse baqolotsi hore leha ho le joalo, ba itlhophile ke ka hona ho tloha maobane le kajeno ba ileng ba etsa kopo ea ho boloka mothangoana o moholo ho fetisetsa literekeng thepa ea menonts’a eo a reng e atlehile ho anela litereke.
O boetsa a fana ka tlhahiso-leseling hore lipeo le tsona li fihlile leha li sa fella. O ts’episitse hore ba ntse ba le lets’olong la ho bona hore li kena ka mokhoa o potlakileng.
Ho feta mona, o itse o tso’enyehile haholo ke botlokotsebe bo etsahalang ha ba leka ho bebofatsa mekhoa ea theko. Ke moo a ileng a supa hore ba thibetse menyetla ea ho reka ka kopanelo kaha seo se bula monyetla oa hore batho ba il’o rekisa thepa ka litjeo tseo ‘muso o sa li behang.
“Hona joale hoa rona ke ho phatlalatsa hore batho bohle ba ntseng ba rekisa thepa eno ea ‘muso ka litjeo tse fapaneng le tseo rona re li tsebang, tseo e seng patuoe tse beuoeng hohle, batho ba joalo re kopa ba tlalehoe kapele-pele. Re tlo ba nkela bohato hobane joale maikemisetso a rona ha se hore likhoebo li be teng, batho ba etse liphaello. Leano lena ke khahlametso ea ‘muso le reretsoeng hore lihoai tsa rona li hlahise lijo ka bongata.” O li kobella joalo Mofosi.
