LESOLE LE THUNTSOE
La 5 Pherekhong 2024
Ka moqolotsi oa rona
Lesole la Lesotho le tlalehoa ke molaoli oa sesole, Lieutenant General Mojalefa Letsoela, le thuntsoe ka likulo tse ‘ne ke monna ea ileng a inehela sepoleseng hammoho le sethunya seo a khobalitseng lesole ka sona. Lipatlisiso tsa koranta li supa ketsahalo ena e etsahetse Maputsoe, Leribe pele selemo se kolumela ka Tšitoe.
Ho lemala hoa lesole leo ho halefisitse molaoli oa sesole, Lit. General Letsoela ea itseng masole a se ‘lumelle ho fetoha mahlatsipa a litlokotsebe feela a sebetsa ka thata ho sireletsa sechaba.’
A bua ka khalefo nakong eo a lakaletsang sesole mahlohonolo a selemo se secha, motebong oa sesole oa Ha Ratjomose Lit. General Letsoela o itse: “Ke re taba ena e se ka ba hlola e etsahala; ha ke na lesole le tla thunngoa ka likulo tse ‘ne ‘meleng ke lesafilone.
Lieutenant General Letsoela le motlatsi oa hae, Major General Matobakele
“Ha ke batle ho utloa hape ke tlaleheloa litaba tse tjena. Lona balaoli ba masole, ha ke na kena ka likelellong tsa lona ho le ruta hore na le tlameha ho etsa joang maemong a tjena.”
“Banna, na re tla sireletsa sechaba ebe ka nqe re boela re fetoha mahlatsipa a litlokotsebe? Re thole re shebelle ntho e tjee re ntse re shebile?” O kharuma joalo molaoli.
O bile a ipiletsa ho balaoli ba ka tlas’a hae hore taba ena e lokela ho khaotsa hang-hang. A tsoela-pele ho ikana ka hore haeba ho le thata eena ka seqo o tla e etella-pele ho felisa bosaoana ba masole a fetohang mahlatsipa a litlokotsebe.
Ho sa le joalo, Motlatsi oa Molaoli oa Sesole, Major General Matela Matobakele le eena o phahamisitse ngongoreho ka masole a shoang ka litsela tseo a reng ke tsa masaoana.
O ipilelitse hore liofisiri ho tloha ka eena ho ea tlaase ho sireletsa masole ka hohle-hohle. A re o lumela hore selemong sena ha ho sa tla ba le masole a shoang ka masaoana. Matobakele o entse mohlala ka lesole le ileng la nyekenngoa ka thipa ha mosali oa lona a tsoela ka ntle a il’o qhala metsi bosiu eaba linokoane lia kena tsa bolaea lesole leo.
Maj. General Matobakele o ile a lomahanya meno hore liofisiri li etse ka hohle-hohle ho sireletsa masole. “Haeba uena ofisiri u hlotsoe ho sireletsa lesole joale le se le shoele, u se ke oa tla ho ‘na oa ntlalehela taba e joalo, uena u se u tla bona hore u e sebetsa joang.”
Major General Matela Matobakele o re masole a makoala a ts’oaroe
A re masole a hopole hore ka hora ea leshome bosiu ke nako ea melancheche ‘me a tla hloloa ho ikobela taelo eo a tla bona.
O phethetse ka ho hlokomelisa masole hore a ipaballe empa a tla ea joaleng bosiu eaba motho e mong o a otla ka tlelapa, ba se ke ba hira koloi ba balehela liahelong. A laela hore ba haneloe ho kena liahelong kaha e le makoala. “Ha ba le joalo MP, u ba koalle kaofela, ke makoala.” O kobella litaba tsa hae joalo Matobakele.
Leihlo la Basotho le buisane le ofisi ea liphatlalatso ntlo-kholo ea sepolesa, Senior Superintended Kabelo Halahala, o hlalositse tafoleng ea hae ho se tlaleho ea ketsahalo ena.
Ha maemo a le tjena, Leihlo la Basotho le boetse la buisana le raliphatlalatso oa Sesole, Lieutenant Colonel Sakeng Lekola ho mo kopa ho fana ka leseli ka ketsahalo ena. “Ketsahalo ena e etsahetse koana Maputsoe, a k’u ikopanye le sepolesa sa Maputsoe haeba ofisi ea liphatlalatso… ntate Halahala a sa e fuoa.” O phethela joalo.
