LEPOLESA LE FUMANOA LE LE MOLATO OA POLAO
Ka Moipone Makhemeng
La 3 Pulungoana 2023
Lekhotla le Phahameng la Maseru maobane, le fumane Police Constable Lillo Pitiri a le molato oa polao ea mofu Lipakuoele Lehlosi ea ileng a timela ka la 17 Phuptjane 2017 kamor’a ho thunyetsoa lefu a le khoebong ea mothamahane e bitsoang Monateng Cocobe, Quthing.
Kamora ho mamela mapaki a fanoeng ke lipaki tse leshome, Moahloli Tšeliso Mokoko o mo fumane a le molato ‘me lekhotla le tlo mo fa kahlolo hamorao.
Ho ea ka bopaki bo tekiloeng, bosiung boo Lehlosi a tla bolaoa, moqosuoa o ile a bonoa makhetlo ka sethunya sa moetso oa bistolo a ntse a se ntša khafetsa. Lipaki li teketse lekhotla hore moqosuoa o ne a bile a k’hok’hela sethunya ho mofu.
Ba neng ba le haufi ba tlalehoa ba ile ba leka ho khalema lepolesa le bakileng lefu. Lipaki li re liketsahalo tsena li etsahetse libakeng tse peli tse fapaneng tsa mothamahane e leng Koaling le Monateng.
Paki ea pele ebile e le motsoalle oa mofu le moqosuoa, Jobo Letsie o ile a senola lintlha tse nyarosang mabapi le tsela eo moqosuoa a neng a tšoere thepa ea ‘muso ka teng (sethunya).
Letsie o pakile hore ka la 21 Phuptjane 2017 ha nako e ka ba hora ea bosupa mantsiboea, o ile a fumana mohala ho tsoa ho paki ea bobeli e leng Reatile Mohai. O re mohaleng moo moqosuoa ka fono ea Mohai o ile a mo memela ho tla noa joala le bona Koaling Bar. O re nakoana a fihlile moqosuoa o ile a ntša sethunya ‘me paki ea bobeli ea mo khalema. Kamora nakoana ba ile ba leba tameneng e ’ngoe e bitsoang Monateng.
Bopaki bo tsoela-pele ho hlalosa hore leetong la bona ho leba Monateng, moqosuoa o ile a boela a ntša sethunya ‘me ka tsela e tšoanang ba ’na ba mo khalema. O bontša hape hore hang hoba ba fihle Monateng bar, moqosuoa o ile a boela a ntša sethunya a se k’hok’ha a se shebisitse ho mofu.
Paki ea boraro ‘Mapiti Kolisang le eena o ile a mo khalema a bile a etsa kopo ea ho mo bolokela sona ka le reng o tla se nka hoseng empa moqosuoa a hana.
Moahloli Mokoko ha a akaretsa bopaki o itse; “Litsie o paka hore mofu o ile a kopa moqosuoa hore a mo rekele koae empa a latola ka le reng o na le chelete ea joala feela. Ho sa le joalo, paki ea pele e ile ea rekela mofu koae a ba e chesa holim’a hithara ba nt’o tsoela kantle ho ea tsuba.
Ha ba ntse ba tsuba, moqosuoa o ile a ba sala morao ‘me ho fihleng hoa hae ho bona a ba bolella hore o se a tsamaea a nt’o kopa hore mofu a mo felehetse.
“Mofu le moqosuoa ba ile ba tsamaea ‘moho empa metsotsoana e ka bang mashome a mararo (30 seconds) paki ea pele e re e ile ea utloa sethunya se khabola kamora ntlo ea mothamahane.
“O ile a mathela moo ho hloela se etsahalang. Ke moo a fumaneng mofu a oele fatše a itšetlehile ka terata a bile a le mong moqosuoa a le sieo sebakeng seo. O ile a mathela ka har’a ntlo ea mothamahane ho bolella ba bang ka se etsahetseng ‘me o re o ile a boela a utloa molumo oa sethunya hape.” Moahloli Mokoko o rialo a pheta bopaki.
Paki e hlalosa e ile ea tsitlalla hore ha ho motho e mong ea ileng a sala mofu le moqosuoa morao. O bontša hore ha ba hlahloba setopo ha ba bona maqeba ho eena. O re ba ile ba mo isa sepetlele moo hamorao a ileng a tlalehoa a timetse.
Ho sa le joalo, tlaleho ea ngaka, Dr. Moorosi ea hlahlobileng setopo, e bontša mofu a ile a lahleheloa ke bophelo ka lebaka la ho tsoa likotsi tse mpe lithong tse kahare ho ‘mele ekasitana le ho lahleheloa ke lithara e le ‘ngoe ea mali a tsoetseng kahare – internal bleeding.
Leha ho le joalo, ‘muelli oa moqosuoa Adv. Mosoeu leha a sa latola bopaki bo tekiloeng ba khaketlana ea kulo e fumanoeng sebakeng sa ketsahalo, o bontšitse ho na le khonahalo ea hore kulo e thuntseng mofu ha se ea sethunya sa moqosuoa.
A re sena o se bua a ipapisitse le tsela ea tšoaro ea bopaki eo a llang ka hore bo fetile matsohong a mangata empa ho sa nkoa menoana (finger prints) pele.
Leha ho le joalo, Moahloli Mokoko o ile a botsa hore na haeba sethunya seo le khaketlana e fumanoeng li tšoeroe ke batho ba 120, na hoo ho hlakola hore kulo eo e amahanngoa le sethunya sa mofu. Adv. Mosoeu o ile a re che. Leha ho le joalo, a hatella hore ho na le khonahalo ea hore ho na le motho ea thuntseng ntle le moqosuoa. A re batho ba neng ba le teng ba supa moqosuoa hobane e ne le eena lepolesa sebakeng seo.
Ho feta mona, o re na ho ka khonahala hore batho leha ba bone motho a bapala ka thepa e kotsi joalo eaba ba ntse ba tsoela-pele ho tsamaea le eena.
Nyeoe ha entse e hatela pele, hang kamora hore liakhente li lahle malepe lekhotla le be le khefutso e khotšoane, moahloli Mokoko o ile a qhelela ka thoko le ho lahlela matjoing bopaki ba moqosuoa ha a re ka letsatsi le boletsoeng o ne a se na sethunya matsohong a hae kaha a ile a siea sa hae ka mahlahahlela a robong hae.
A bontša hore mapaki a tekiloeng a ea hokahana ka hore moqosuoa o bonoe ka sethunya letsatsi leo le hore lipaki li ile tsa ema ntle ho tsitsipano ea letho esita le ho tsepama mapaking a tsona. Mokoko a teka hore o lumellana le bopaki ba hore sethunya se fumanoe ka mahlahahlela a tšeletseng ‘me hoo ho nyallana le tlhaloso e fanoeng bopaking.
A qetella ka ho beha hore o na le maikutlo a hore molumo oa sethunya o ileng oa utloahala lekhetlo la bobeli e ne e le nakong eo moqosuoa a ithunyang leotong e le ho pata bopaki, le ho etsa sa-mokana-e-ka ba ne ba hlasetsoe.
Ha a fera nyeoe ena, Moahloli Mokoko o ile a phatlalatsa hore lekhotla le fumane Pitiri a le molato ’me a laela hore beile ea hae e hlakoloe hang-hang a nt’o leba setsing sa batšoaruoa.
Lekhotla le tla balla Pitiri kahlolo mohlomong bekeng e tlang.
