KHANG E BEHA MALA A MOTHO KA NTLE, THUATHE
La 20 Tlhakubele 2023
Mohlankana ea ka bang lilemo li 25 oa Lekhalong, Sehlabeng sa Thuathe, Berea o ntse a loanela bophelo ba hae Sepetleleng sa Sehopotso sa Mofumahali ‘Mamohato kamora hore e mong a mo nyekenye ka thipa hoo mala a hae a ileng a tsoela kantle mesong ea maobane.
Ketsahalo ena e etsahetse ntlong e ’ngoe ea mothamahane hona Lekhalong, Sehlabeng sa Thuathe, Berea.
Ho ea ka ba boneng ka mahlo ha li etsahala, mohlankana e mong o ile a hapa mohala oa thekeng oa lehlatsipa hammoho le chelete ea hae ka pokothong ha eo a ile le sephume sa boroko hona mothamahaneng moo.
Ho utloahala ha e mong oa ba neng ba tlile mothamahaneng moo a ile a khalema eo hore bonyane a lese mohala oa thekeng kaha a se a ikhapetse manyane a lehlasipa.
Ba boneng ka mahlo ba bontšitse hore ha monga chelete a tsoha, o ile a tseba hore thepa ea hae e utsuoe ke mang ‘me a leka ho buisana le eena hore a li busetse empa eo a etsa khang a mo tsohela matla.
O ile a mo khorohela a mo nyekenya ka thipa hoo mala a hae a bileng a hlahella ka ntle. Ho bonahala monga thipa a ile a leka ho mo nyekenya hape e le ho mo qetela empa a mo fosa a nt’o itlhaba ka thipa eo!
Ba haufi ba ile ba leka ho thusa lehlatsipa ba le tlamisa ka masela ‘me ba mo potlakisetsa sepetlele moo a ntseng a alafuoa hona teng. Ho sa le joalo, monga ketso le eena o ile a sala phofu ea hae morao ho ea sepetlele kaha le eena o itemalitse bohlasa.
