ENRICH E KHOBA BATHO MATŠOAFO
La Tlhakubele 2023
Mookameli oa Enrich Stores, Thabang Nthako, o hlahelletse kajeno a leka ho phubula litaba tse melomong ea batho tse hlalosang hore lebenkele leo le mathuleng a ho putlama kaha thepa e fokola haholo kahara lebenkele.
Ba bang ba batseteli ba lla ka hore boto ea Enrich, e thehile likhoebo tse peli; Enrich Fitness le Enrich Creatives tseo ba reng ke liqeto tsa boto e le ‘ngoe kaha e sa ka ea tsebisa batseteli. Ba re malinyane ao a Enrich a khelohile hole haholo le chebelo-pele ea Enrich.
A bua le koranta ea Public Eye thapameng ena, Nthako o itse: “Ke hlaha mona ho tla otlolla litaba tse ntseng li matha marangrang mona, tse buang ka lebenkele la lona. Ha ke bone ho na le tšisinyeho kahara lebenkele e ka hlahang marangrang mona hoba bareki ba rona le batseteli ba tšohile ekasitana le ba re fepelang ka thepa.
“Kahona ke le khoba matšoafo bareki ba khabane le lona batseteli. Ke ‘nete mane le mane re ile ra ea Keresemeseng ‘me bafani ba thepa ba koala hoba mohlomong re ile ra reka hanyane kapa hoa etsahala joang.
“Ho tloha ka la 15 Tlhakubele thepa e ntse e-ba teng ‘me ‘na ke khothetse haholo hoba le ne se le sa bone li-combo hoba litheko li ne li ea holimo le tlaase tse bakiloeng ke ntoa eane ea Ukraine.
“Boiteko bo teng, khobang matšoafo bareki le lona batseteli. Litaba tse ntseng li buuoa ka rona ke litaba tsa moea feela tse ka ‘nang eaba ke liqabang tsa batho le bookameli ba pele ba lebenkele lena.
“Ke tokelo ea lona ho tla mona lebenkeleng la lona ha le bona litaba li sa tsamaee hantle ho na le ea sitisang tšebetso hore khoebo e tsoele-pele, motho ea joalo re ea mo tlosa. Leha ho le joalo, bohlanya bo teng koano mane le mane empa re tšoere ka thata ho tlosa bohlanya bono.” Nthako o rialo.
O bontšitse hape hore batseteli ba 13 ba nyahlalitse lebenkele lena ba le furalla ha a ne a ba kopa hore ba sebeletse lebenkele ka thata. O re o belaela hore beng ba mafosisa a hore lebenkele le tlo putlama ke bona batho bao.
“Kea le tšepisa hore thepa e tlo kena ho tloha ka Labone, tlohong le tlo fumana litheolelo. Le ba fanang ka mahe kahara batseteli, tlisang mahe koano re tlo a reka.” O lihella likhala.
Ka ho tšoana e mong oa batsamaisi, Monghali Letuka o lumetse hore ho na le lifefo tse ntseng li foka kahara lebenkele empa a bua ka matla hore lifefo tseo ha li na ba sisinya ka letho.
