BASOTHO BA TLOKOTSING EA HO SHOA
… LITLHARE HA LI KENE KA LESOTHO
Ka Moipone Makhemeneng
Mabenkele a Basotho a jereng bophelo ba sechaba ka thekiso ea litlhare le meriana a lla ka khaello ea litlhare le meriana kaha ba sitoa ho reka kantle ho naha hoba ‘muso ka Lekala la Bophelo o bontšitse ha buka ea polomiti ea ho reka litlhare kantle ho naha e felile.
Mookameli oa Mokhatlo oa Thekiso ea Litlhare le Meriana (Retail Pharmacy Owners’ Association of Lesotho) monghali Peter Velaphe o hlaloselitse Moipone Makhemeng oa koranta ena hore tlhokahalo ea polomiti ea ho reka litlhare ka ntle ho naha e amme tšebetso ea bona haholo kaha ba felloa ke litlhare tseo ba li rekisetsang sechaba. Karolo e kholo ea sechaba e fumana litlhare mabenkeleng ana kaha litsing tsa ‘muso ho na le khaello ea tsona khafetsa.
Mong. Peter Velaphe
Velaphe a supa hore le bareki ba bona ba ea sotleha ‘me ka kotloloho a qolla bareki ba sebelisang litlhare tsa bophelo bohle bao a bontšitseng ha e tlo ba boriki ho re na ba feta joang bothata bona.
A bontša ha ba se ba e-na le ho feta khoeli joale ba thutse thaba ho se meriana e kenang kahara naha ho ea mabenkeleng a bona. O itse ha se lekhetlo la pele ba thulana le bothata bona kaha ngoahola ka eona nako e tšoanang ba ile ba thulana le bona.
Velaphe a hlalosa hore ba ile ba kopana le ba lekala le ikarabellang la bophelo ho thusetsa ka hore bonyane ha ba ntse ba sheba hore na ba fumana buka ea polomiti joang ba mpe ba thusoe ka tharollo ea nakoana empa hofihlela hajoale ha ho e-s’o be le nko ho tsoa lemina.
Ho sa le joalo, koranta ena e lekile ho fumana lehlakore la Lekala la Bophelo empa ofisiri ea liphatlalatso lekaleng leo, mofumahali ‘Mateboho Mosebekoa o arabile moqolotsi tjena: “I am not the right candidate [ho araba litaba tsena] monga tsona ke Director-Pharmacy ke hona ke mo etselitseng molaetsa hobane ha u motho oa pele, haeba o tla nkarabela. Ke bone a sa nkarabe a ngotse ntho tseo ke sa li utloeng, ha ke tsebe hore o tla araba neng.” Mosebekoa o rialo.
Liteko tsa ho fumana lehlakore la letona la Bophelo, mohlomphehi Selibe Mochoboroane, ha li’a atleha kaha mohala oa hae o ne o sa kene.
