BAITHUTI BA NUL HA BA E-S’O FUMANE MANGOLO
Ka Moipone Makhemeng
La 21 Tlhakubele 2023
Ba bang ba baithuti ba phethetseng lithuto tsa bona Sekolong se Seholo sa Sechaba (National University of Lesotho) ba lla sa ‘mokotsana ka hore sekolo ha se e-s’o ba abele mangolo a bona kamora mokete oa likapeso o bileng ngoahola ka la 24 – 28 Mphalane 2022.
Ho utloahala baithuti ba Lekalana la Setsi sa Thuto-Boholo (Institute of Extra Mural Studies – IEMS) e le bona ba anngoeng haholo ke bothata bona.
Puisanong le Leihlo la Basotho, ba bang ba baithuti ba itse bookameli ba sekolo ha bo na pampiri e hatisang mangolo a bona.
Baithuti ba NUL likapesong, 2019
Balli ba re e se e le nako ba ntse ba iponahatsa ofising ea Mongolisi ho fumants’oa mangolo feela ba khutla le se ba isitseng.
Koranta e lekile ho fumana lehlakore la sekolo ho Mongolisi, mofumahali Maqalika Lerotholi empa a re supisa Ofisi ea Thuto moo teng ea ikarabellang a bonts’itseng ha litaba tsa sekolo li tsoa ka Mongolisi feela ‘me a e-s’o mo fe tumello ea hore a ka fana ka tsona.
“Litaba tsa sekolo li tsoa ka Registrar ‘me ha a sa bua le ‘na hore nka li nts’a ke tla hloleha ho li bua. Khutlela ho ‘na kamora metsotso e meraro.” Ho rialo e mong oa liofisiri tsa NUL ea hanneng ho fana ka lebitso la hae.
Leha ho le joalo, hamorao ha moqolotsi a khutlela ho eena ha a kaba a hlotse a arabile mohala oa hae.
