BAITHUTI BA FOKOTHI BA LEMATSA NKHONO
… BOOKAMELI BO HLALOSA MAEMO A RENANG
Ka Moipone Makhemeng
La 27 Phuptjane 2023
Maemo a litaba ke a sithabetsang sekolong sa Lerotholi Polytechnic kajeno moo ho bonoeng baithuti ba eme mapatlelong a sekolo ba tsanyaola lipina tsa boitseko ho ipilaetsa.
Sesosa sa boipelaetso se bakiloe ke hore setsi sa lihlapiso National Manpower Development Secretariat (NMDS) ha se e-s’o lefe sekolo mokoloto oa baithuti o mokaalo ka M25 milone. Baithuti ba lla hape ka hore NMDS ha e-s’o ba fe litsiane tsa lijo le bolulo. Qeto ea sekolo, Lekala la Thuto le la Lichelete e bile hore baithuti ba tsoele-pele ho ngola leha ba kolota sekolo. Boholo ba baithuti bo eme thabeng bo hana ho ngola lihlahlobo.
Ha litaba li le tjena ho bonahala mapolesa mapatlelong a sekolo a behile maemo leihlo hore baithuti ba se tsoe taolong ba senya thepa ea sekolo.
Leha ho le joalo, ho na le tlaleho e supang baithuti hoseng hona ba lemalitse nkhono e mong oa mofeta-ka-tsela. Tlaleho e re o lemetse hampe hoo a ileng a potlakisetsoa sepetlele.
Leha ho le joalo, e mong oa baithuti ba boitsekong ea buileng le koranta ena a sa rate ho tsejoa ka lebitso o bontšitse ha ba le masoabi hore nkhono o qeteletse a lemetse. O re maikemisetso a bona e ne e se ho lematsa eena. O hlapantse hore ba itlama ho nka boikarabello holima temalo ea nkhono.
Litaba tsena li etsahala tjena e le ha botsamaisi ba sekolo bo bitsitse ‘moka oa bo-ralitaba ho ba beha leseling ka maemo a renang sekolong sena. Ke hona ‘mokeng ona moo mookameli oa sekolo, Prof. Spirit Tlali a hlalositseng hore kamora hore maemo a litaba a be moo a bileng teng lipakeng tsa Sekolo le NMDS ba ile ba ba le lipuisano le Lekala la Thuto le la Lichelete mabapi le mokoloto oo NMDS o ba kolotang oona o mokaalo ka M25 milone. O re leha ho le joalo ba fihletse qeto ea hore baithuti ba ngole ho ntse ho na le mokoloto.
Ha a tsoela-pele Prof. Tlali o bontšitse hore lihlahlobo li thakhohile maobane lehoja e se ka tsela e tloahelehileng. “Ka Labone la 22 Phuptjane 2023, Senate sa Sekolo se ile sa ba le kopano ‘me hoa fihleloa qeto ea hore lihlahlobo li tla qala ka Mantaha oa la 26 Phuptjane 2023.
Prof. Spirit Tlali (ea hare) o ts’etlehela baqolotsi boemo ba litaba
“Ke rata ho hlakisa hore lihlahlobo li thakhohile maobane empa har’a liqholotso tse ngata. Taba ea lichelete tsa baithuti e ntse e sebetsoa ke Lekala la Thuto le la Lichelete.” Ke Prof. Tlali a hlalosa.
O boetse a otlolla boteng ba bahlanka ba tšireletso mapatlelong a sekolo. “Nakong ena ea lihlahlobo re kopile tšireletso ho sepolesa hore se tlo beha maemo leihlo.” Oa hlolosa.
O hlalositse hore ha se baithuti bohle ba sa rateng ho ngola lihlahlobo, a re ka hona molemong oa tšireletso le bolokolohi ba bona ba ile ba kopa mafapha a tšireletso ho kena lipakeng kaha ho ne ho na le baithuti ba etsetsang ba ratang ho ngola litšoso; ba re ba tlil’o ba ntša ka lihlopheng.
Mapolesa haufi le baithuti mapatlelong a sekolo
O boetse a bontša hore baithuti ba bang ba sa rateng ho ngola ho na le bao e leng litlokotsebe hoba ba sentse thepa ea sekolo bekeng e fetileng. Prof. Tlali o thatisellelitse ka hore ho molemo hore mahlanya a bokaneloe ka bongata.
Ha a phethela, o tsitlaletse hore lihlahlobo li tla tsoele-pele empa a re ba khethileng ho se ngole ba tla kotula litholoana tse bohla.
O itse melaoana ea thuto ea sekolo e tla sebetsa tlas’a maemo ‘ohle. O lomahantse meno hape hore sekolo qetellong ea letsatsi se lebeletse mokoloto o lefshoe kaha ha ba batle ho iphumana ba le boemong boo ba hlolehang le ho lefa lekhetho joaloka nako ea ho feta.
Ho sa le joalo, ho ea ka polelo ea baithuti ba neng ba khobokane jareteng ea sekolo, e mong oa bona o bolelletse Leihlo la Basotho hore ba ntšuoe ka lithunya kahare ho liphapusi tsa ho ngola ke liofisiri tsa tšireletso leha ba ne ba itokiselitse ho ea ngola.
Moithuti eo o behile pampiri ena leseling hore ke baithuti ba sa feteng mashome a mabeli (20) ba khethileng ho ngola kajeno hammoho le maobane.
