BABELAELLOA POLAONG EA RALIKONELO BA PHATLALATSOA
La 20 Phuptjane 2023
Ho bile le ‘moka oa bo-ralitaba kajeno moo sepolesa se behileng baqolotsi leseling ka khatelo-pele eo se e khathileng mabapi le polao ea seboholi Ralikonelo Joki.
Senior ACP Ts’eliso Moerane, mookameli oa mats’olo a ikhethileng le phala ea sepolesa Senior Superintendent Mpiti Mopeli ba ile ba bua le baqolotsi. Mopeli o hlalosa hore lipatlisiso li hatetse-pele polaong ea Joki. O itse ba se ba tseba babelaelloa lefung la hae ‘me a re ba ntse ba batlana le bona: “Re le sepolesa re ntse re batlana le banna ba latelang mabapi le polao ea ntate Ralikonelo Joki ea ileng a thunngoa ka la 14 Motšeanong 2023 bosiu ha a qeta ho tsoa keiting ea Ts’enolo FM.
“Banna bao ba ne ba le bahlano, ba ne ba tsamaea ka Honda Fit e putsoa ea linomoro tsa A 006 BBC e seng e le matsohong a sepolesa.”
Mopeli o itse babelaelloa ba ntseng ba batloa ke ba latelang: Sootho Liphoto (35) oa Mokema ea lulang Ha Abia, Kamo Phakoe (35) oa Jorodane, Ha Rapokolana ea lulang Mokema le Qoaling le Mothusi Tlelase (31) oa Mokema Koro-Koro. Bana ke ba balehileng ho ea ka sepolesa.
Ho sa le joalo, Sepolesa se lokollotse lifoto tsa babelaelloa, lia latela:
Babali ba tla hlokomela hore leha S. Supt Mopeli a itse babelaelloa polaong ea Joki ba ne ba le bahlano, ha a bolele mabitso a ba bang ba babeli ebile ha a re ba ntse ba batla empa o tiisa hore hajoale ha ba e-s’o ts’oaroe babelaelloa.
“E mong ke moqhobi eena o teng, oa bohlano ho bonahala ho bile le qoaketsano lipakeng tsa hae le Ralikonelo litabeng tsa mophatong, Mothusi Tlelase le Sootho Liphoto ba boetse ba bealelloa polaong ea batho ba babeli Mokema, e leng monna oa Koro-Koro, Mothibe Mothibe ea ileng a thunngoa le mosali oa Mosotho, Thomello Ntsane ka la 20 Mots’eanong 2023.” Ke raliphatlalatso oa sepolesa eo.
O boetse a tekela baqolotsi hore banna bao kamora ho bolaea Mothibe le Ntsane ba ile ba hapa mehala le sethunya sa Mothibe. Polaong ena ho ntse ho sebelisitsoe koloi eane e putsoa ea Honda Fit. Senior Supt Mopeli o phethetse litaba ka hore ho bonahala babolai ba sebetsa ka hore ho be le ba lisang metsamao ea batho ba tlo bolaoa, hore motho o hokae ka nako efe.
“Ba babeli ba ne ba lisitse metsamao, ba babeli ba thuntse, e mong ke moqhobi.” Mopeli o rialo.
Polaong ea Mothibe sepolesa se re ba ne ba tsekisa Mothibe hore oa phapha; “Joale ba ne ba ile ho lata sethunya ho eena.”
Mopeli o re pelaelo ke hore babolai ba balehetse Afrika Boroa ‘me a re hajoale ha ba e-s’o ts’oaroe motho.
