AKHENTE E RE ‘MOLAI A AHLOLOE LILEMO TSE PELI
Ka Moipone Makhemeng
La 20 Phuptjane 2023
Rankakata Moiloa le Matanya Moiloa ba hlahile lekhotleng le phahameng, Maseru maobane, ka pele ho moahloli ‘Mabatšoeneng Hlaele ho ea ikopela mohau oa ho fuoa kotlo e bobebe.
Sena se latela hore moahloli Hlaele a ba fumane ba le molato oa polao ea bafu ba babeli, Teke Chere Letsapo le Realeboha Letsapo esita le ho lematsa e mong Tsotang Qofa ka la 11 Hlakola 2013 Pae-Lea-Itlhatsoa, Mokhotlong. Bala mapaki a tekiloeng mona: MAPAKI
Nyeoeng ena baqosuoa ba ne ba le bane; e mong o se a timetse athe e mong esale a tšola tlhako-morong a ineha naha.
Adv. Tšoeunyane Mokobori e le ‘muelli e mong oa baqosuoa ha a ba kopela kotlo e bobebe o itetse bootloana ho lekhotla a re baqosuoa ka bobeli ke lekhetlo la mantlha ba etsa tlolo ea molao.
Adv. Tšoeunyane Mokobori, ‘muelli e mong oa baqosuoa
Ho feta mona, o boletse hore bobeli ba na le malapa ao ba a jarileng ho a phelisa. O ile a hlalosa hore moqosuoa oa pele (Rankakata) o na le bana ba bane ‘me e moholo o na le lilemo tse 12. O itse moqosuoa oa bone (Matanya) o na le bana ba bararo bao ntle ho bona ho nang le babeli ba mahetleng a hae. O re bao ke ba khaitseli ea hae e esale e leba Afrika Boroa ho ea fata metsuntsunyane.
Adv. Mokobori o bontšitse hore letsibulo la moqosuoa oa bone ke moithuti Botho University ‘me moqosuoa o mo tšehelitsoe ka karolo e ‘ngoe ea chelete. O re lefapha la lihlapiso (NMDS) le mo tšehelitse ka karoloana e fokolang feela ‘me ho hlokeha tlatsetso ea batsoali.
Adv. Fumane Maieane, ‘muelli e mong oa baqosuoa
A mang a mabaka a tekiloeng ke eena ebile hore baqosuoa ha ba sokolisa lekhotla nakong eo nyeoe e tsoelang-pele. O boetse a bontša hore ha ho na mohla ba ileng ba kena-kenana le lipaki tsa mofapa-hlooho. Ntlha ea ho qetela e bile hore ba bontšitse tšoabo ketsong ea bona ea polao.
Leha ho le joalo, ‘muelli oa mofapa-hlooho, Adv. Tsebiso Fuma o tekile mabaka ao a reng kotlo e loketse ho ba boima ka ‘ona. Har’a ‘ona e bile hore bafu ba bolauoe ka sehloho; ka tsela e se nang botho. O re ba ne ba rapaletse fatše ba hloka thuso empa baqosuoa ba tsoela-pele ho ba fenetha ka sehloho. Adv. Fuma o re baqosuoa ba ile ba khutlela ho bona ho ba khakhatha ho ea pele ba sa natse hore ba rapalletse fatše ba se na monyetla oa ho baleha.
Adv. Tsebiso Fuma, ‘muelli oa mofapa-hlooho
O bile a beha ho lekhotla hore baqosuoa ba ne ba sebelisa libetsa tse kotsi haholo tse kang selepe le sabole ekasitana le molamu oa tšepe joalokaha ba ile ba beha mapaking a bona baqosuoa. Adv. Fuma o hlalositse hore ketso e mahlonoko ena e etsahetse kapela ‘m’e oa mofu e mong le morali oa hae ea neng a le lilemo li mashome a mabeli ka nako eo. O boetse a supa hore ketso ena e amme kelello ea motsoali oa mofu.
Ha a tsoela-pele, Adv. Fuma o re babolai bana ba loketse ho behoa hole le sechaba ‘me sena se tla eketsa tšepo ea sechaba holima bosireletsi haholo-holo makhotla ka kotloloho. Ha a eletsa lekhotla holima kotlo, o bontšitse hore bonyane ba se fumantšoe kotlo e ka tlaase ho lilemo tse mashome a mabeli (20).
Ho sa le joalo, ‘muelli oa bona, Adv. Mokobori o ba kopetse kotlo e bobebe haholo. Kopo ea hae e bile hore moqosuoa oa pele (Rankakata) a ahloloe lilemo tse leshome. Eaba o kopa lekhotla hore le shebe moqosuoa oa bone (Matanya) ka leihlo la mohau ka ho mo ahlola feela lilemo tse peli kaha o re eo seabo sa hae sea fokola lipolaong tsena. Bala mapaki le mahamo a nyeoe ena mona MAPAKI.
Baqosuoa ba tla boela ba hlaha lekhotleng le phahameng hosane ho mamela kotlo eo ba tlil’o e fuoa ke moahloli Hlaele.
