VCL LE ECONET MATJALENG
… KA ‘NYELISO’ EA LEKHOTLA
Ka moqolotsi oa rona
La 3 Hlakola 2024
Lik’hamphani tsa mehala tsa Lesotho, Econet Telecom Lesotho (ETL) hammoho le Vodacom Lesotho (VCL) li matjaleng ka lebaka la ho koala likarete tsa mehala ea batho ba sa ngolisang likarete tsa bona tsa mehala (SIM Cards) ho ea ka molao o mocha oa ngoliso ea tsona.
Paramente e ile ea fetisa molao o tlamang batho bohle hore ba ngolise likarete tsa bona tsa mehala empa Adv. Sehapi o ile a qholotsa qeto ena Lekhotleng la Molao oa Motheo ngoahola.
Ho sa le joalo, mokhatlo o loanelang le ho sireletsa litokelo tsa sechaba o bitsoang Equal Rights for Justice hammoho le Akhente Fusi Sehapi ba ritetse nyeoe khahlanong le lik’hamphani tseo kamora ho koala likarete tsa batho ba sa ngolisang ka la 1 Hlakola 2024.
Adv. Fusi Sehapi
VCL le Econet li qoselletsoa le Letona la Molao le Litaba tsa Molao oa Motheo, Letona la Likhokahanyo, Lesotho Communication Authority (LCA), Vodacom Lesotho, Econet Telecom Lesotho le Ramolao e Moholo oa ‘Muso.
Ngoahola ka Motšeanong, Adv. Sehapi o ne a kope lekhotla hore le laele VCL le Econet ho se koale likarete tsa batho ka la 28 Phuptjane 2023 e leng letsatsi le neng le behoe e le la ho qetela la ho ngolisa likarete empa LCA ea ‘na ea chechisa koalo hofihlela e beha letsatsi la moshoelella la ngoliso e-ba la 31 Pherekhong 2024 eaba ka la 1 Hlakola likarete tse sa ngolisoang li ea koaloa.
Taba e ka sehloohong eo Sehapi a leng khahlanong le ngoliso ea likarete ke hore ngoliso eo e hanya sechaba kaha batho ba qobelloa ho fana ka leseli ka bona le hlahang likareteng tsa boitsebiso (IDs) ha ba ngolisa karete tsa bona. O re batho ha ba etse sena ka boithaopo empa ba qobelloa. O re qobello ena e ka thoko ho molao.
Khang-kholo nyeoeng ea Sehapi e phephetsang ho koaloa hoa likarete ke hore ngoliso ea likarete e tlo thibela batho ba loantšang bobolu (whistle-blowers) ho etsa joalo hammoho le batho ba fanang ka menyenyetsi ho sepolesa. O re molao ona o tlo sitisa baqolotsi ba bang ho nyebekolla le ho pepesa bobolu ba ipatile.
Kamora ho koaloa hoa likarete tsa mehala, khang ea Sehapi le mokhatlo oa Equal Rights for Justice ke hore lik’hamphani tsa mehala li tsoetse-pele ho koala likarete tsa mehala tsa batho ba sa li ngolisang empa ho na le nyeoe ka lekhotleng la molao oa motheo e phephetsang taba ea hore likarete li koaloe.
“Moqosuoa oa boraro le oa bone ba tsoetse-pele ka qeto ea bona ba le bang ba koala likarete tsa mehala tsa batho ba e-s’o ngolise likarete tsa bona ka lebaka la meharo kaha ba ichebetse feela ho nyolla lekeno ba sa natse taelo e ileng ea tsoa ea lekhotla tabeng ena hore ba emele hore lekhotla le qete ka nyeoe ena.
“Ke beha ho lekhotla hore boitšoaro bo tjena bo fosahetse kaha bo nyenyefatso molao. Re hloka thuso e potlakileng ho lekhotla khahlanong le baqosuoa bana.” KD Mabulu o itela ho lekhotla joalo, a kopa hore nyeoe ena e nkoe e potlakile.
Thapeli e ka sehloohong ea bo-Sehapi ke hore VCL le Econet li bontše mabaka ao li ke keng tsa ahloloa limilone tse mashome a mararo tsa Maluti (M30 milone – M30 000 000) ka nyeliso ea lekhotla ka boomo le ka maikemisetso ka ho koala likarete tsa mehala tsa batho ba sa ngolisang empa ho na le nyeoe lekhotleng e phephetsang ho koaloa hoa tsona.
Ho feta mona, balli ba batla hore lekhotla le laele VCL le Econet ho bula likarete tse koetsoeng hofihlela nyeoe ena e fela.
Akhente ea Adv. Fusi Sehapi ke KD Mabulu athe mokhatlo oa Equal Rights for Justice o tla buelloa ke Adv. Lebohang Nzuzi.
