TONA-KHOLO HA E NA BOIPHIHLELO – MACHESETSA
Ka Moipone Makhemeng
La 21 Phuptjane 2023
Moetapele oa Basotho National Party (BNP), Machesetsa Mofomobe kajeno o bile le ‘moka oa baphatlalatsi ba litaba BNP Centre. Mofomobe o ile a teka puo ea hae a ipapisitse le kahlolo e fanoeng ke lekhotla la molao oa motheo maobane moo a hlotseng tona-kholo ka nyeoe.
O ile a hopotsa baqolotsi hore ka la 17 Motšeanong 2023 mohlomphehi tona-kholo o ile a romela mautloela le mapolesa lapeng ha hae ho ea nka mehala ea hae ka le reng o belaelloa lefung la Ralikonelo Joki hammoho le ho ameha bobolung ba ho hlatsuoa hoa chelete. A re seo tona-kholo e se entse ka letona ofising ea hae – Limpho Tau.
“Ba ne ba tlisitse sephephechana ba re ba tlo nka lifono tsa ka le tsa mosali oa ka. Le tla hopola ke ile ka re ha ho mokoko o llang joalo hobane ke ne ke tseba hore taba eo e thulana le molao oa motheo. Ke ka hona ke ileng ka hana ka lifono tsa ka.” O hlalosa joalo.
Ramanasi o ile a bontša hore ka kutloisiso ea hae mautloela a ne a lokela ho pota lekhotleng ho kopa tumello ea ho nka mehala ea hae.
O ile a otlolla hore ho na le karohano ea matla tabeng ea puso ho thibela mafapha a mang ho etsa mosebetsi oo e seng oa ‘ona. Mona o ne a bontša hore ke makhotla a ka fanang ka tumello ea hore thepa ea motho e nkoe e seng mautloela kapa tona-kholo.
“Hape ke bile sechele ho fana ka lifono tsa ka hoba sephephechana seo se ne se tekennoe ke motho eo e seng letona la tšireletso.” O rialo a bile a re o ile a mathela khotla.
“Ke ne ke batla hore temana ea 26 (2) ea molao oa maultloela e nkoe e se molaong, le hore ho nka lifono tsa ka ho thulana le molao oa motheo tabeng ea lekunutu la motho.” Mofomobe o teka joalo.
O hlalositse hape hore pele a fumana samane ea ho nkoa hoa lifono o ile a fumana senannapo sa hore o tlo tšoaroa ke hlooho ea mautloela – Pheello Ralenkoane. “Nyeoe ea rona e ile ea mameloa ke baahloli Sakoane Sakoane, Moneuoa Kopo le ’Malebona Khabo. Lekhotla le fumane lintho tse ngata nyeoeng ena; le fumane hore molao oo ke oa bokhopo. Nthoena e lahluoe ke lekhotla.
“Litona-kholo tse fetileng; ntate Mosisili, ntate Thabane le ntate Majoro ha ba e-s’o sebelise nthoena ea molao (Temana ea 26 ea molao oa mautloela e laelang mautloea ho nka thepa ea motho). Ke re ha e sa phela leha ho ne ho le thata ka 1998 re le Phaleising mane.
“Sena se ea bontša hore tona-kholo ea joale e hloloa ke tsamaiso – ha e na boiphihlelo. Ke re Temana ea 26 ea molao ono oa mautloela ha e sa phela.” O bua a le motlotlo.
“Sephephechana se neng se re ke fane ka lifono lekhotla le re se fosahetse, it has been declared null and void.”
Mofomobe o bile a ipiletsa ho tona-kholo hore a tlohele boroko, a tlohele ho sebelisa litsi tsa tšireletso ho senya mabitso a batho. O itse tona-kholo o silafalitse molao oa motheo ka ketso eo a e entseng; “Ho hlakile le ho tsipa sehole hore we have an incompetent prime minister. O sebelisitse NSS hampe kapa eona e mo sebelisitse hampe.” Ke eena a bua ka matla.
