NYEOE EA THIBELO EA TŠISINYO-TLHOKA-TŠEPO EA MAMELOA
Ka Moipone Makhemeng
La 20 Mphalane 2023
Nyeoe e hlahletsoeng ke setho sa paramente mokheng oa Revolution for Prosperity (RFP), lebatooeng la Thaba-Moea, Lejone Puseletso e mametsoe maoba ke Lekhotla la Molao oa Motheo le bopiloeng ka baahloli ba bararo; Tšeliso Monaphathi, Molefi Makara le Keketso Moahloli.
Nyeoe e mametsoe ke baahloli ba bararo, (from left) Molefi Makara, Ts’eliso Monaphathi le Keketso Moahloli
Nyeoeng ena Puseletso o qholotsa tšisinyo-tlhoka-tšepo ho tona-kholo, Ntsokoane Sam Matekane le ‘muso oa hae. Tšisinyo e hlahletsoe ke moeta-pele oa Basotho National Party, Machesetsa Mofomobe ka la 13 Mphalane 2023. Nyeoe e ne e lokela ho mameloa ka la 30 Mphalane 2023 empa Adv. Christopher Lephuthing e le ‘muelli oa moikarabelli oa bosupa o ile a itela ho lekhotla hore ekakhona nyeoe e mameloe ka potlako ka moo lekhotla le ka khonang ka teng.
Adv. Lephuthing o re sena se latela bohlokoa ba lintlha tsa molao oa motheo tse hlahang kopong ea Puseletso. Lephuthing o re ho latela molao, puso e litulong ha e sa lokela ho ba matsohong a RFP le maparamente a khemang le eona. O re sena se pakoa ke lipalo tsa lehlakore la bohanyetsi tse seng li imetse tsa ‘muso.
Adv. Christopher Lephuthing o re ‘muso ha o sa na lipalo tsa ho busa
Hang hoba Adv. Lephuthing a tekele lekhotla hore kopo ha e’a thibeloa, Adv. Moshoeshoe lebitsong la mofapa-hlooho o bontšitse ba sa ba le monyetla oa ho ithuta likateng tsa nyeoe kaha ba sa fuoa lipampiri tsa eona. Adv. Lephuthing kamora ntlha eo o ile a re; “Mphato oa ka mona o emetse babuelloa ba hae (tona-kholo le ramolao e moholo oa ‘muso), ke eena ea thibileng tšisinyo ea ho hloka tšepo ho tsoele-pele hofihlela nyeoe e phetheloa ke lekhotla.
Adv. Moshoeshoe o buella ba ‘muso, tona-kholo le ramolao e moholo
“Ba emisitse mosebetsi ono oa ho voutela ho feta hoa tšisinyo ka lipampiri tsa lekhotla e le hore le fane ka tataiso ho paramente. Ruri ena beng ba ka ke bona eka re hloka ho kena ka botebo tabeng ena. Taba ena e potlakile ha e shejoa, e potlakile haholo.
“Bakopi ba hlakisitse haholo hore linomoro tsa tlhophiso li fetohile. Ho na le ‘muso o mocha o lokelang ho nolofalloa ho nka puso. Taba ena e potlakile haholo ‘me mofapa-hlooho o ke ke oa re ka lebaka la ho se phethahale ho nepahetseng lipampiring, sena ha se bolele hore ‘muso o mocha o lokelang ho nka puso o liehisoe.” Ho rialo Lephuthing.
Ho sa le joalo, ‘muelli oa moqosi, (Lejone Puseletso), Adv. Letuka Molati o bontšitse ho se moo ‘muelloa oa hae a kentseng nyeoe e potlakileng. A re ba kentse nyeoe ka tsela e tloaelehileng empa le teng e lokela ho buuoa ka potlako empa e se ke ea potlakisoa.
“Muelloa oa ka o nka taba ena e le taba ea bohlokoa sechabeng ’me o re e lokela ho sebetsoa ka potlako empa e se ke ea potlakisoa. Ka mantsoe a mang, beng ba ka, le lokela ho fuoa monyetla oa ho fuoa lillo tse felletseng le lihlooho tsa likhang hore lekhotla le tle le abe toka holim’a nyeoe.” Molati o tšetlehela lekhotla joalo.
Adv. Letuka Molati – ‘Muelli oa moqosi, Lejone Puseletso
Kamora khang e telele le hore lekhotla le nke khefutso, moahloli Makara o ile a fana ka taelo ea hore liakhente li il’o fanana lipampiri ‘me ka la 27 Mphalane 2023, ba khutle nyeoe e tlo tsoelapele.
A bontša hore ba utloile, ‘me ba buile ka litaba hore na lekhotla leo ke le nepahetseng hore nyeoe e ka tšetšethoa ho lona ‘me tseo ke lintlha tseo ba tla kena ho tsona ka letsatsi le boletsoeng – la 27 Mphalane 2023.
