MORENA NAPO MAJARA OA SEKAMANENG KE MOFU
Ka Moipone Makhemeng
La 2 Phuptjane 2023
Morena oa Sebaka oa mehleng oa Sekamaneng, Ha Majara, Berea, Morena Napo Majara (66) o fumanoe a timetse lapeng ha hae, Sekamaneng hoseng kajeno.
Ea buileng lebitsong la lelapa ebile e le ngoetsi ea mofu, mofumahali ‘Mampesi Majara o hlaloselitse koranta ena hore kajeno ha a il’o hloela morena Napo, ke moo a fumaneng a hlokahetse!
“Ntate Napo ke fumane a iphomoletse, ho bonahala esale a robala. Setopo se bonahala se ntse se le maemong a matle, ha ho shebahale e le khale a hlokahetse.” Mofumahali Majara o hlalosa joalo.
O tsoetse-pele ho hlalosa hore mofu e ne e le motho ea matla haholo, feela a kula a ntse a tsamaea, sesosa e le maoto empa pelaelo ke hore le mafu a mang joaloka phallo e phahameng ea mali a ne a se a mo ts’oenya. Mofumahali Majara o hlalosa hore mofu o ne a iphelela a le mong.
Mofu o ne a tlotsoe setulong sa borena ke Lekala la ‘Muso la Puso ea Libaka, Borena le Paramente ka selemo sa 2017 ‘me hoa hlomamisoa mora oa hae, Bereng Majara ho tsoela-pele ka puso, ho busa metse ea Sekamaneng, Sekhutlong le Koalabata e le morena oa sebaka.
Mofu ke mora oa bafu Morena Kholiso Majara le mofumahali ‘Manapo Majara. O hlahile ka la 23 Tlhakubele 1957.
