LEPOLESA LE BOLAILENG LE LENG LEA INEHELA
Ka moqolotsi oa rona
La 11 ‘Mesa 2023
Lepolesa le ahileng Ha ‘Manteo, Thaba-Bosiu, Maseru le lilemo li 34, le tlalehoa se inehetse sepoleseng sa Quthing kamora ho fenetha lepolesa la mosali hammoho le nyanyaula ea hae ka ho ba phara ka letsopa-la-kapa ba le babeli ka Sontaha, hoseng, Cocobe, Quthing.
Mookameli oa motebo oa sepolesa sa Quthing, Senior Superintendent ‘Mamoipone Mohloai o hlalosa hore ‘melaelloa o ile a fihla ntlong e ‘ngoe ea mothamahane a bona mosebetsi-‘moho le eena oa monna a fihla moo a tsamaea le basali ba babeli – bana bao e leng bafu kajeno.
Senior Superintendent Mohloai o re ‘melaelloa o ile a khupisoa ke ho bona kharebe ea hae (eo e seng lepolesa) e ntse e tsamaea le basebetsi-‘moho le eena (e leng monna le mosali ba mapolesa). ‘Melaelloa o hlalosoa a ile a botsa mosebetsi-‘moho le eena oa monna hore hobaneng a ntse a tsamaea le ‘kharebe’ ea hae.
Lower Moyeni, Quthing
Ha ho hlake hore na lepolesa la monna le ile la fa ‘melaelloa tlhaloso efe, empa Senior Superintendent Mohloai o re monna oa lepolesa o ile a theoha koloi ho ea reka lino-mapholi, ke moo ‘melaelloa a ileng a ea koloing moo basali ba neng ba lutse ka ho eona ‘me a fihla a ba fafatsa ka lethala la likulo hofihlela ba nehela moea.
Mofu e mong ke lepolesa le lilemo li 37 ea ahileng Braakfontein, athe e mong eo ‘melaelloa a reng ke kharebe ea hae o lilemo li 40 ‘me eena o ne a ahile Ha ‘Malifatjana, Phamong. Bafu ba ne ba lula Lower Moyeni, hona Quthing.
Ba boneng ketsahalo ena ka mahlo ba tlaleha ‘melaelloa a ne a phunkhane haholo. Ho hlahella hape hore ‘melaelloa o ne a na a le qabang le mocheliete oa hae.
